भिमफेदी-कुलेखानी सडकखण्डको ठाउँ-ठाउँमा पहिरो,कान्तिलोकपथ पनि अवरुद्ध

८असोज,हेटौँडा । बुधबार देखिको अविरल वर्षाका कारण काठमाडौं जोड्ने छोटो दुरीको मार्ग भिमफेदी-कुलेखानी सडक खण्ड र कान्तिलोकपथमा पहिरो खसेपछि दुवै मार्ग अवरुद्ध बनेका छन्। 

जिल्ला प्रहरी कार्यालय मकवानपुरका प्रहरी प्रवक्ता डिएसपी इन्द्र बहादुर रानाले बताए अनुसार भिमफेदी कुलेखानी सडकखण्ड अन्तर्गत इन्द्रेसरोबर-२ देउराली नजिक  बुधबार बिहान  गएको पहिरो र बुधबार रातभरको अविरल वर्षाका कारण बिहिबार पनि  सोहि ठाउँमा पहिरो गएकोले सडकखण्ड अवरुद्ध रहेको,त्यसैगरी कान्तिलोकपथ अन्तर्गत बकैया ११ सिमात नजिक,बैकया  १२ ठिङ्गन नजिक र भिमफेदी-८ कालोपहिरो नजिक पहिरो गएको लोकपथ पनि अवरुद्ध रहेको जनाइएको छ ।यता हिजो देखिको लगातारको वर्षाले पहिरो पन्छयाउन कठिनाइ भएपछि वैकल्पिक मार्ग अपनाउन भनिएको ईलाका प्रहरी कार्यालय भिमफेदीका प्रहरी निरीक्षक सुरेन्द्र श्रेष्ठले प्रष्ट खबरलाई बताएका छन्। 

'देउराली भन्दा मुनी धेरै ठाउँमा पहिरो गएको छ, काठमाडौंबाट हेटौँडा तर्फ आएक  केही  सुमो बिच बाटोमै रोकिएका छन्, हेटौँडा तर्फबाट आएकालाई हेटौँडा तर्फ फर्काइएको वा वैकल्पिक मार्ग प्रयोग गर्न भनेका छौं, पानि परिरहेको छ, पहिरो तत्काल पन्छाउने अवस्था छैन- प्रहरी निरीक्षक श्रेष्ठले भने।अहिले अवरुद्ध रहेको  भिमफेदी-कुलेखानी सडक खण्डको ईन्द्रसरोबर-२ देउराली नजिक हिजो बिहान पहिरोमा पुरिएर एक स्कार्पियो चालकको ज्यान गएको थियो भने मोटरसाइकलमा रहेका २ जनालाई  सकुशल उद्धार गरिएको थियो।