माओवादी मकवानपुरको चुनावी समिक्षा

१४ असार, हेटौंडा । नेकपा माओवादी केन्द्र मकवानपुरको समिक्षा बैठक सम्पन्न भएको छ । बैठकमा गाउँ र नगरपालिका प्रमुखहरुले स्थानीय तह निर्वाचनमा भएको गतिबिधिबारे जानकारी गराएका थिए । उनीहरुले निर्वाचमा हार÷जित हुनको कारण प्रस्तुत गर्दै पार्टीलाई थप मजबुत बनाउन संगठन सुदृढिकरण अभियान सञ्चालन गर्नुपर्नेमा जोड दिएका थिए ।
बैठकले गत वैशाख ३१ गते सम्पन्न निर्वाचनमा माओवादी केन्द्रले सोचेजस्तो सफलता प्राप्त नगरेपनि उत्साहजनक रहेको निष्कर्ष निकालेको छ । स्थानीय निर्वाचनको कमजोरी सच्याउँदै प्रभावकारी अभियान सञ्चालन गरे आउँदो प्रदेश र संघीय निर्वाचनमा पार्टीलाई मकवानपुरमा पहिलो शक्तिको रुपमा स्थापित गराउन सकिने समेत बैठकको निष्कर्ष छ ।
बैठकले सबै गाउँपालिका र नगरमा पार्टी सेल कमिटिहरु निर्माण गर्दै आगमी भदौं अन्तिमसम्म गाउँ, नगर, जनवर्गीय संगठन र जातीय मोर्चाहरुको सम्मेलन सकाउने निर्णय गरेको पार्टी कार्यालय सदस्य तथा सञ्चार बिभाग प्रमुख कमान सिं पाख्रिन (पृथक) ले बताए । बैठकले निर्वाचमा भए गरेका कमि कमजोरी छानबिन गर्न पार्टी केन्द्रीय सल्लाहकार समिति सदस्य कौशल पाण्डेको संयोजकत्वमा तीन सदस्यीय छानविन कमिटि गठन गरेको छ ।
जिल्ला इन्चार्ज कुमारी मोक्तानको सभाध्यक्षता एवं  पार्टीका केन्द्रीय कार्यालय सदस्य लिलामणि पोखरेलेको प्रुमख आतिथ्यतामा भएको बैठकमा केन्द्रीय सचिवालय सदस्य सुर्य सुवेदी पथिक, पार्टी पोलिटब्युरो सदस्य तथा सांसद रामनारायण बिडारी, माओवादी केन्द्र मकवानपुरका जिल्ला संयोजक प्रेम बहादुर पुलामी लगायतको सहभागिता रहेको थियो ।