इंग्लिस प्रिमियर लिग: म्यानचेस्टर युनाइटेडको पहिलो जित

१० असोज, हेटौंडा । इंग्लिस प्रिमियर लिग फुटबलमा म्यानचेस्टर युनाइटेडले पहिलो जित निकालेको छ ।
शनिबार भएको खेलमा ब्राइटनलाई ३-२ गोल अन्तरले पराजित गर्दै युनाइटेडले पहिलो जित निकालेको हो ।
ब्राइटनको मैदानमा एक गोलले पछि परेको स्थिति उल्टाउदै युनाइटेडले जित निकालेको हो ।
खेलको ४० औं मिनेटमा निल माउपेले पेनाल्टीमा गोल गर्दै ब्राइटनलाई सुरुवाती अग्रता दिलाएका थिए ।
तर, ४३ औं मिनेटमा ब्राइटनका लेविस डंकले आत्मघाती गोल गरेपछि पहिलो हाफको खेल १-१ गोलको बराबरीमा सकिएको थियो ।
खेलको ५५ औं मिनेटमा मार्कस रास्फोर्डले गोल गर्दै युनाइटेडलाई २-१ को अग्रता दिलाए ।
खेलको इन्जुरी समयको पाँचौ मिनेटमा सोली मार्चले गोल गर्दै ब्राइटन २-२ को बराबरीमा ल्याए ।
तर, इन्जुरी समयको ११ औं मिनेटमा ब्रुनो फर्नान्डेसले पेनाल्टीमा गोल गर्दै युनाइटेडलाई ३-२ को जित दिलाए ।
ब्राइटनका माउपेले पेनाल्टी क्षेत्रमा ह्याण्डबल गरेपछि भीएआरको सहयोगमा युनाइटेडले पेनाल्टी पाएको थियो ।
जितसँगै युनाइटेडले २ खेलमा ३ अंक जोडेको छ । युनाइटेड तालिकाको १३ औं स्थानमा रहेको छ । पहिलो खेलमा युनाइटेड क्रिस्टल प्यालेससँग ३-१ गोल अन्तरले पराजित भएको थियो ।
ब्राइटनको यो दोस्रो हार हो । ३ खेल खेलेको ब्राइटनको ३ अंक रहेको छ । ब्राइटन तालिकाको दशौँ स्थानमा रहेको छ ।