२५ हजार सक्रिय संक्रमित पुगेपनि बन्दाबन्दी हुन्नः स्वास्थ्य मन्त्रालय

१७ असोज, हेटौंडा । स्वास्थ्य तथा जनसंख्या मन्त्रालयले नेपालमा २५ हजार सक्रिय संक्रमित पुगेपनि बन्दाबन्दी गरीहाल्नुपर्ने अवस्था नरहेको जनाएको छ ।
मन्त्रालयका प्रवक्ता डा. जागेश्वर गौतमले तत्काल २५ हजार संक्रमित पुगेपनि मन्त्रालयको बन्दाबन्दी गर्ने योजना नभएको स्पष्ट पार्दै तिनको व्यवस्थापन गर्न सकिने जनाएका छन् ।
यही असोज ७ गते स्वास्थ्य सचिव लक्ष्मण अर्यालको अध्यक्षतामा बसेको इन्सिडेन्ट कमाण्ड सिस्टमको बैठकले भने २५ हजार सक्रिय संक्रमित भएमा सरकार मातहत रहेका अस्पतालले उपचारको व्यवस्थापन गर्न नसक्ने जनाउँदै सरकारलाई बन्दाबन्दी गर्न सिफारिस गर्ने निर्णय गरेको थियो ।
तर प्रवक्ता गौतमले मुलुकमा फेरि पनि बन्दाबन्दी गर्ने योजना नभएको उल्लेख गर्दै अहिलेकै अवस्थामा संक्रमित बढ्न थाले सरकार संरचनाले थेग्न नसक्ने तर निजी स्वास्थ्य संस्थाहरुसँगको सहकार्यमा संक्रमितहरुको व्यवस्थापन गर्न सकिने बताए ।
सक्रिय संक्रमित २५ हजार पुगेपछि निजी स्वास्थ्य संस्था र होटेलमा राख्ने योजना सरकारले राखेको छ । सरकारले गत चैत ११ गतेदेखि साउन ६ गतेसम्म बन्दाबन्दी तथा भदौ ४ गतेदेखि अन्तिम सातासम्म काठमाडौँ उपत्यकामा निषेधाज्ञा लागु गरेको थियो ।
यसैविच स्वास्थ्यमन्त्री भानुभक्त ढकालले पनि नेपाल उद्योग वाणिज्य महासंघ र राष्ट्रिय व्यावसायिक पहलका प्रतिनिधिसँग भेटी बन्दाबन्दी तत्काल नहुने जनाउँदै हल्लाको पछि नलाग्न अनुरोध गरेका छन् ।