भीमफेदी सुमो दुर्घटना :मृतकको संख्या ३ पुग्यो,२ जनालाई भरतपुर लगियो

१८ असोज,हेटौंडा । हेटौंडा–काठमाडौं छोटो दुरीको मार्ग अन्तरगत मकवानपुरको भिमफेदी–६ चिसापानीगढी नजिक सुमो दुर्घटना हुँदा मृत्यु हुनेको संख्या ३ पुगेको छ ।

झापा जोरपानी गाउँपालिका वडा नम्बर ७ की २५ बर्षीया देवीकुमारी गिरीको हेटौँडा अस्पतालमा  उपचारका क्रममा मृत्यु भएको हो भने अन्य दुई जनाको घटनास्थलमै मृत्यु भएको थियो  ।मृतक २ जना पुरुषको सनाखत हुन नसकेको छैन ।

यद्यपि मृत्यु हुने दुबै पुरूषको साथबाट मकवानपुर ठेगाना उल्लेख  राज राना मगरको नामको र पदमपोखरीको  भिमलाल सिंहको नामको कागजपत्र फेलापरेको भएपनि सनाखत हुन नसकेको मकवानपुर प्रहरी प्रवक्ता डिएसपी इन्द्र बहादुर रानाले  बताएका छन्। 

दुर्घटनामा ६ जना घाइते भएका छन्, घाइतेमध्ये रौतहट रंग्पुरका २६ बर्षीय सुजन कुमार काफ्ले र मकवानपुर गढी-४ का २७ बर्षीय सोम बहादुर गुरुङलाई उपचारका लागि चितवन पठाईएको छ भने २ जनाको हेटौंडास्थित चुरेहिल र एक बालक र सुमो चालकको भीमफेदीमा उपचार भईरहेको जिल्ला प्रहरी कार्यालय मकवानपुरले जनाएको छ ।हेटौँडाबाट काठमाडौंतर्फ जाँदै गरेको ना १ ज ४१०६ नम्बरको दक्षिणकाली यातायातको सुमो भिमफेदी ‌६ चिसापानी गढी नजिक  अनियन्त्रित भई सडकबाट करिब एक सय मिटर तल खसेको थियो ।