भुकम्प पीडितको समस्या सम्बोधनको माग

२० साउन, हेटौँडा । मकवानपुरको छतिवन गाविसका सर्वदलिय संयन्त्रले गाविसका भुकम्प पीडितको समस्या सम्बोधन गर्न माग गरेका छन् । उनीहरुले विहिबार मकवानपुरका प्रमुख जिल्ला अधिकारी मानबहादुर विकलाई ज्ञापनपत्र बुझाउँदै समस्या सम्बोधनको माग गरेका हुन् । 
पुर्ननिर्माणका लागि अनुदान सम्झौताको थालनीको तयारी गरिरहँदा गाउँमा विरोध हुन थालेपछि दलिय संयन्त्रसहितको टोली जिल्ला प्रशासन कार्यालयमा डेलिगेशन आएका जनाईएको छ । उनीहरुले भुकम्पमा भौतिक क्षति भई राहत रकम बुझेका पनि पछिल्लो लगत संकलनका क्रममा छुटेको, ऐलानी जग्गावाल भुकम्प पीडित पुर्ननिर्माणको प्रक्रियामा समेटिन नसकेका, पछिल्लो लगत संकलनमा भौतिक क्षति नभएकाहरुको समेत नाम परेका लगायतका विषयमा प्रजिअ विकको ध्यानाकर्षण गराएका छन् । उनीहरुले छुटेका बास्तविक भुकम्प पीडितको लगत संकलन हुनुपर्ने, पूर्जाधनीले झैं ऐलानी जग्गाधनीलाई पनि पुर्ननिर्माण प्रक्रियामा समावेश गरिनुपर्ने, पछिल्लो समय लगत संकलनका क्रममा भएका त्रुटी सच्याउनुपर्ने बताए । 
प्रजिअ विकले पछिल्लो लगत संकलनका क्रममा छुटेका बास्तविक पीडितलाई गाविसमा पुनरावलोकन फारम भराउन राजनैतिक दलका प्रतिनिधि र गाविस सचिवलाई सचेत गराए । उनले ऐलानी जग्गाको हकमा भुकम्प प्रभावितहरुको जग्गा दर्ताको कार्यविधि आईसकेकाले पुर्ननिर्माण प्राधिकरणका लागि दर्ता सुचारुका लागि अवधि तोक्न आग्रह गर्ने बताए । प्रजिअ विकले पुराना बास्तविक पीडित छुटेको र नयाँ थपिएको विषयमा जिल्ला तहमा छलफल भई केन्द्रमा जानकारी गराएकाले निष्कर्ष निस्कने बताए । उनले भुकम्पका क्रममा क्षति नभए पनि ढाँटेर सरकारी रकम बुझ्नेलाई ठगी मुद्धा लाग्ने भएकाले यसबारे समेत स्थानीयस्तरमा जानकारी गराउन प्रजिअ विकले सबैलाई आग्रह गरे । 
टोलीमा पूर्व सभासद प्रेमबहादुर पुलामी, गाविस सचिव शिवराम बोहरा, नेपाली कांग्रेस छतिवनका अध्यक्ष भुमिनन्द गौतम, एमाले छतिवनका अध्यक्ष राजन दंगाल, माओवादीका भक्तबहादुर खत्री, राप्रपा नेपालका गोवद्र्धन गौतम, नेकपा माओवादीका रामहरी गौतम, विभिन्न दलका जिल्ला नेता, तामाङ उत्थान समाजका प्रतिनिधि र स्थानीयको सहभागिता रहेको थियो ।