नेकपाले गल्हत्याउन खोज्यो, कांग्रेसले कुर्सी भाँच्यो

१९ असोज, बुटवल । २०७१ माघ ५ गते तत्कालीन एकीकृत माओवादीका सांसदहरूले तत्कालीन संविधानसभा बैठक तोडफोड गरे । त्यस समय कांग्रेसले चर्को आलोचना गरेको थियो । संविधानसभामा माओवादीले भनेजस्तो नभएपछि तत्कालीन माओवादीका सांसदहरु संसद तोडफोडमा उत्रिएका थिए ।
त्यस्तै दृष्य सोमबार प्रदेश नम्बर ५ को प्रदेश सभामा देखियो । प्रस्तावित लुम्बिनी प्रदेशको राजधानी दाङ सार्ने भन्‍ने प्रस्तावको विरोधमा कांग्रेस सांसदहरुले प्रदेश सभामा नाराबाजी गरिरहेका थिए ।
कांग्रेसको विरोधको बेवास्ता गर्दै प्रदेश राजधानी र नामाकरणसम्बन्धी प्रस्ताव अघि बढाउन आन्तरिक मामिला तथा कानुनमन्त्री कुलप्रसाद केसी रोस्टमतर्फ अघि बढे । कांग्रेस सांसदहरुले नाराबाजी जारी गर्दै विरोध जनाइरहेका थिए । मन्त्रीले मर्यादापालकलाई हप्काइदप्काइ गर्दै नाराबाजी गरिरहेका कांग्रेसका सांसदलाई गलहत्याएर बाहिर निकाल्न आदेश दिए । उक्त आदेशपछि कांग्रेस सांसदहरु थप आक्रोशित बने ।
मन्त्रीले चिच्याएर मर्यादापालकलाई भने,–‘यिनीहरूलाई बाहिर घिसारेर निकालिहाल्नुस्, निकालिहाल्नुस् ।’ त्यसपछि थप आक्रोशित बनेका कांग्रेस सांसदहरु तोडफोडमा उत्रिएका हुन् । लोकतान्त्रि प्रणालीमा प्रतिपक्षीलाई नामेट पार्ने अथवा संसदबाट घिसारेर बाहिर निकाल्ने भन्‍ने हुँदैन । प्रतिपक्षीले नाराबाजी गर्ने नै विरोधको स्वरुप हो । विरोध जनाउँदैमा संसदबाट गलहत्याउने भनेपछि आक्रोशित बनेका कांग्रेस सांसदहरु तोडफोडमा उत्रिएका हुन् । तोडफोडबाट केही टेबल कुर्सी र माइकहरु भाँचिएका छन् ।
साभार : लेखाजोखान्युज