जिवित रहँदै आफ्नो श्राद्ध

२० असार, हेटौँडा । श्राद्ध भन्ने वित्तिकै वितेका आफन्तलाई स्मरण गर्दै गरिने एउटा पवित्र कार्यको रुपमा बुझ्ने गरिन्छ । 
हाम्रो घरमा पनि आफ्ना वितेका आफन्तको श्राद्ध हुने गरेको छ । तर मंगलबार हेटौँडा–२ का एक बासिन्दाले आफ्नै श्राद्ध गरेका छन् । यसअघि नेपालका नाम चलेका नेता र ६०१ सभासदको श्राद्ध लगायतका गतिविधि गर्दै आएका राकेशकुमार शर्माले आफ्नै श्राद्ध गरेका हुन् । उनको श्राद्ध पण्डित डिकनाथ पौडेलले गरेका थिए । यसअघि २०७२ को संविधान मरिसकेको भन्दै श्राद्ध गरेका शर्मा यही संविधान अनुसार २०७४ बैशाख ३१ गतेको स्थानीय तह निर्वाचनमा हेटौँडाको मेयर पदमा उम्मेदवारी दिएका थिए । 
निर्वाचनमा उनले दुई अंकको मत समेत ल्याउन सकेनन् । संविधान मरेको घोषणा गर्ने आफुले नै निर्वाचनमा उम्मेदवारी दिएकोमा आत्मालोचन गर्दै आफ्नो श्राद्ध गरेको उनले बताए । उनले आफु जिवितै रहँदा श्राद्ध गर्ने प्रचलन रहेको समेत बताए ।
आफुलाई हिन्दु राष्ट्र र राजसंस्थाको पक्षपाति बताउँदै शर्मा विभिन्न समयमा यस्तै खाले गतिविधि गरेर आफुलाई चर्चामा ल्याउन प्रयास गर्ने गर्दछन् । उनले केही समय अघि एक सहकारी र विद्यालय विरुद्ध पनि यस्तै प्रचार गरेका थिए ।
बर्दिया गुलरिया नगरपालिका ६ का बासिन्दा रहेका उनी करिव २ बर्षदेखि हेटौँडामा बस्दै आएका छन् ।