शक्तिपीठ खोल्न नदिएको भन्दै हेटौंडाका धार्मिक संस्थाको बिरोध

१ कार्तिक, हेटौंडा । नवरात्रको अवधिमा शक्तिपीठहरू खोल्न नदिएको भन्दै हेटौंडाका धार्मिक संस्थाले बिरोध जनाएका छन् । 
हेटौंडाको कुष्माण्ड सरोवर त्रिवेणीधाममा शनिबार आयोजित कार्यक्रमका वक्ताहरूले नवरात्रको समयमा शक्तिपीठहरू नखोल्न सरकारले गरेको निर्देशनको बिरोध गरेका हुन् । बजारमा अनियन्त्रित भीडभाड बढेको तथा सार्वजनिक यातायातको साधनमा जथाभावी यात्रु हालेर ओसारपसार गर्दा सङ्क्रमणको जोखिम नदेख्ने सरकारले आस्थाका केन्द्र मठमन्दिरबाट सङ्क्रमणको जोखिम देखेको भन्दै आश्चर्य प्रकट गरे ।
कार्यक्रममा बोल्दै समितिका अध्यक्ष ईश्वरीप्रसाद न्यौपानेले नवरात्रभर शक्तिपीठहरू खोल्न दिनुपर्ने बताए । यसैगरी समितिका उपाध्यक्ष कुमार पौडेलले नवरात्रमा शक्तिपीठमा निषेध गरेर मात्र सङ्क्रमण नियन्त्रण नहुने बताए । कुष्माण्ड सरोवर त्रिवेणीधाम विकास समितिले चालु आर्थिकवर्षमा डेढ करोडभन्दा बढीको भौतिक संरचना तथा तटबन्ध निर्माण गर्ने योजना बनाएको छ ।
समितिको एघारौँ वार्षिक साधारणसभाका अवसरमा संस्थाका कोषाध्यक्ष मणिप्रसाद सुवेदीले धामको स्तरोन्नति, तटबन्ध, मूर्ती, खानेपानी शौचालय तथा पार्क निर्माण गर्ने योजनाबारे जानकारी दिए । यसका लागि १ करोड ५८ लाखको अनुमानित बजेट प्रस्तुत गरे । यसका लागि वाग्मती प्रदेश पर्यटन विकास आयोजनाबाट ३० लाख, हेटौंडा उपमहानगरपालिकाबाट २० लाख, तटबन्धका लागि जलउत्पन्न प्रकोप केन्द्रबाट ७० लाख, वडा कार्यालयबाट १० लाख र सहयोगी दाहरुबाट १० लाख बजेट प्राप्त हुने अनुमान रहेको बताए । 
धामले गतवर्ष ५२ लाख रुपैयाँ भौतिक संरचना निर्माणमा खर्च गरेको थियो । समितिले गत आर्थिक वर्षमा पाँच पाण्डवको मूर्ति निर्माण, पार्क, ढिडकुरेपाटीलगायतका संरचना निर्माण गरेको थियो ।