पशुपतिनगर प्रहरीद्वारा लागुऔषधसहित हेटौँडाका ५ जना पक्राउ

५ कार्तिक,हेटौँडा ।  ईलाका प्रहरी कार्यालय पशुपतिनगरले मंगलबार राति  लागुऔषधसहित ५ जनालाई पक्राउ गरेको छ। 

ईलाका प्रहरी कार्यालय पशुपतिनगरबाट प्रहरी निरीक्षक देवराज काफ्लेको नेतृत्वमा खटि गएको प्रहरीको चेकिङ तथा गस्ती टोलीले पुर्व पश्चिम राजमार्ग अन्तर्गत हेटौँडा -१५ चुरिया र रातोमाटेबाट लागुऔषधसहित हेटौँडाका ५ जनालाई पक्राउ गरेको हो।मंगलबार राति विरगंज तर्फबाट हेटौँडा तर्फ आउँदै गरेको ना २५ प ६९५७ नम्बरको मोटरसाइकललाई रोकि चेकजाँच गर्दा २७५ पिस नाइट्रोभेट सहित  मोटरसाइकल चालक हेटौँडा-३ का ३९ वर्षीय दिनेश भण्डारी र मोटरसाइकलमा सवार हेटौँडा ११ का ४० बर्षीय सिताराम लामिछानेलाई पक्राउ गरिएको मकवानपुर प्रहरी प्रवक्ता डिएसपी इन्द्र बहादुर रानाले बताएका छन्। 

त्यसैगरी मंगलबार रातिनै हेटौँडा-८ र १५ को सिमानामा संकास्पद अवस्थामा   हिडिरहेको १ महिला सहित २ पुरुष प्रहरीलाई देखेर भाग्न खोज्दा नियन्त्रणमा लिएर चेकजाँच गर्दा लागुऔषध बरामद गरिएपछि पक्राउ गरेको हो। पक्राउ पर्नेमा ९५ पिस नाइट्रोभेट सहित हेटौँडा-१७ हटियामा २७ बर्षीय दिपेश भुजेल,त्यसैगरी १३ एम्फुल डाइजोपाम,१६ एम्फुल फेनारगन,१५ एम्फुल नुरफिन सहित हेटौँडा-१० राप्तिरोडका २६ बर्षीय एलिस श्रेष्ठ र ७५ एम्फुल नाइट्रोभेट सहित हेटौँडा-६ की २३ बर्षीया नम्रता चौलागाईं रहेको डिएसपी रानाले बताएका छन् ।  

उनिहरु सबैलाई आवश्यक अनुसन्धानका लागि जिल्ला प्रहरी कार्यालय मकवानपुरमा राखिएको र आवश्यक अनुसन्धान भइरहेको जनाइएको छ। ईलाका प्रहरी कार्यालय पशुपतिनगरले यस अघि लकडाउनका समयमा लागुऔषध ओसारपसारमा संलग्न र कारोबारीलाई पक्राउ गर्न सफल भएको थियो।