कोरोना टेष्ट : हेटौँडामा पोजेटिभ, भरतपुरमा नेगेटिभ

९ कार्तिक,हेटौंडा । हेटौँडा-१ की ६६ बर्षीया बिष्णु माया श्रेष्ठले कार्तिक ५ गते हेटौँडा-१० मा गोरक्षेश्वर आइसोलेसनमा पुगेर स्वाब दिइन्, हेटौँडाको एक अस्पतालमा उपचार गराइरहेकी श्रेष्ठको कार्तिक ७ गते बिहान स्वास्थ्य अवस्था असामान्य भएपछि चितवनको भरतपुरमा रहेको चितवन मेडिकल कलेज (सिएमसी) मा लगियो । यता हेटौँडामा संकलित  स्वाब रिपोर्ट भने आइसकेको थिएन। 

अस्पताल पुगेपछि श्रेष्ठका भाइ विकेशलाल श्रेष्ठले हेटौँडा आइसोलेसनमा फोन गरेर रिपोर्टको बारेमा जानकारी लिंदा रिपोर्ट आउन बाँकी रहेको जानकारी पाए ।श्रेष्ठ रिपोर्टको प्रतिक्षामा रहे, तरपनि साँझ सम्म रिपोर्ट  नआएपछि विष्णुमायाले सिएमसीको स्वाब संकलन केन्द्रमा ७ गते साँझ स्वाब दिइन् । सिएमसीमा स्वाब दिएको भोलिपल्ट हेटौँडामा दिएको स्वाब परीक्षणमा उनको रिपोर्ट पोजेटिभ आयो । अस्पतालले विरामीको अवस्थालाई मध्यनजर गरेर सावधानीपूर्वक बिष्णु मायाको उपचार सुरु गर्यो। यता कार्तिक ८ गते शनिबार साँझ सिएमसीमा गरिएको परीक्षणको रिपोर्ट आयो तर रिपोर्ट पोजेटिभ नभएर नेगेटिभ देखियो । 

तर एउटै व्यक्तिको १ दिनको फरकमा आएको रिपोर्टले श्रेष्ठ परिवार दोधारमा परेका थिए। यद्यपि सिएमसीले त्यही रिपोर्टका आधारमा उनको उपचार गरिरहेको छ । अहिले फुपुको अवस्था सुधार हुदै गएको विकेशलालले बताएका छन् । 'चितवन मेडिकल कलेजले उपचारका नगरेको भए फुपुको अवस्था नाजुक हुन सकथ्यो'-विकेशले भने ।

यसअघि पनि हेटौंडामा भएको परीक्षणमा पोजेटिभ देखिएका हेटौँडा-३ र हेटौँडा-४ का दुई व्यक्तिको रिपोर्ट भरतपुरमा र  काठमाडौंमा नेगेटिभ पाइएको थियो । श्रेष्ठले यस्तो रिपोर्टले समयमा उपचार नपाएर  मानिसको ज्यान समेत जान सक्ने भन्दै कोरोना परीक्षण रिपोर्टलाई विश्वसनीय बनाउन नियमनमा कडाइ गर्नुपर्ने औंल्याए ।