मुग्लिन-नारायणगढ सडक राति बन्द हुने

२३ असार, चितवन । विस्तारको काम भइरहेको नारायणगढ मुग्लिन सडक आउँदो असार २५ गते आइतबारदेखि रातको समयमा बन्द हुने भएको छ। चितवन जिल्ला प्रशासन कार्यालयमा बिहीबार भएको बैठकले यस्तो निर्णय गरेको अाजको नागरिक दैनिकमा समाचार छ ।

पहिरो आएर ज्यानै जान थालेपछि व्यवस्थापिक संससदको विकास समितिले दिएको निर्देशन बमोजिम जिल्ला प्रशासन कार्यालयमा भएको सर्वपक्षीय बैठकले यस्तो निर्णय लिएको हो।

असार नौ गते मध्यरातमा आएको पहिरोमा परेर सो सडक खण्डको कालीखोलामा प्रहरी चढेको भ्यन नै बगेको थियो । भ्यानमा रहेकामध्ये तीनवना प्रहरीको शब भेटिएको थियो । एकजना प्रहरी र भ्यानको अवस्था अझसम्म अज्ञात नै छ। सो घटनापछि असार १३ गते संसदको विकास समितिका सभापति रविन्द्र अधिकारीसहितका सांसदहरुले नारायणगढ मुग्लिन सडक खण्डको स्थलगत अध्ययन गरेका थिए।

स्थलगत अध्ययनपछि विकास समितिले दिएको १२ बुँदे निर्देशनमा रातको समयमा गाडी चलाउनु जोखिम पुर्ण हुने ठहर गर्दै बन्द गर्न भनिएको थियो। चितवनका प्रमुख जिल्ला अधिकारी नारायणप्रसाद भट्टका अनुसार असार २५ गतेदेखि काठमाडौं र पोखराबाट चितवन तर्फ आउने गाडीहरुले साँझ पाँच बजेभित्रै मुग्लिन पार गर्नु पर्नेछ। नारायणगढ हुँदै जाने गाडीहरुले साँझ छ बजेभित्र दासढुंगा पार गर्नु पर्ने छ।

‘बिहानपख दासढुंगाबाट चार बजे र मुग्लिनबाट पाँच बजे मात्रै गाडीहरु खुल्नेछन्। रातभर कुनै गाडी चल्ने छैनन्। अत्यावश्यक सेवाका गाडीहरुलाई पनि परिस्थिति हेरेर मात्रै छाडिने छ’ प्रमुख जिल्ला अधिकारी भट्टले भने।

यसअघि गत पुसबाट दिउँसो यातायात बन्द गरेर निर्माण कार्य हुँदै आएको थियो । असार नौ गतेको घटनापछि दिउँसो गाडी बन्द हुन छाडेको थियो ।