सात सय ६ उम्मेद्वारको धरौटी जफत 

२४ असार, हेटौँडा । स्थानीय तह निर्वाचनमा मकवानपुर जिल्लाका स्थानीय तहबाट विभिन्न पदमा दुई  हजार दुई सय चालीस  उम्मेद्वारी दिएका मध्ये सात सय ६ उम्मेद्वारहरुको  धरौटी जफत   हुने भएको छ । 

मकवानपुरको ८ वटा गाउँपालिका, एउटा नगरपालिका र उपमहानगरपालिकामा २ हजार २ सय ४० जनाले उम्मेद्वारी दिएका मध्ये ७ सय ६ जनाको धरौटी जफत हुने निर्वाचन कार्यालयले जनाएको छ । निर्वाचनमा कूल खसेको सदर मतको १० प्रतिशत मत नआएमा धरौटी जफत हुने जिल्ला निर्वाचन कार्यालय मकवानपुरले जनाएको छ ।

धरौटी जफत हुनेमा सबैभन्दा बढि हेटौंडा उपमहानगरपालिकाका उम्मेद्वारहरु रहेको जिल्ला निर्वाचन कार्यालय मकवानपुरका सुचना अधिकारी दिनेश श्रेष्ठले बताए । कार्यालयका अनुसार हेटौंडा उपमहानगरपालिकामा २ सय जना उम्मेद्वारको धरौटी जफत हुने भएको छ ।

यस्तै  मकवानपुर जिल्लाको  ८ गाउँपालिकाहरुबाट कुल एक हजार ४ सय ७२ जनाले उम्मेदवार दिएकोमा ८ गाउँपालिकाहरुबाट ४ सय ८ जनाको धरौटी जफत हुने भएको छ  । यस्तै मकवानपुरको उत्तरी थाहा नगरमा ९८ जनाको धरौटी जफत हुने कार्यालयले जनाएको छ ।  

धरौटी जफत हुनेहरुमा सबैभन्दा कम बाग्मतीमा ४४ जना र सबैभन्दा धेरै ७३ जना मनहरी गाउँपालिकामा रहेको निर्वाचन आयोगले जनाएको छ ।