रहेनन् स्वामी रामानन्द गिरी

२५ असार, हेटौंडा । १००८ स्वामी डा. रामानन्द गिरी महाराज शनिबार काठमाडौं पशुपतिस्थित शंकराचार्य मठमा ब्रह्मलीन भएका छन् । केही समयदेखि निमोनियाबाट पीडित स्वामी डा. गिरी एक सातादेखि ग्रान्डी अस्पतालमा उपचाररत रहेको अन्नपूर्ण पोष्टको समाचारमा उल्लेख छ ।

उनको आइतबार देवघाटमा जल समाधि गर्ने कार्यक्रम छ । शनिबारै उनको पार्थीव शरीर देवघाटतर्फ ल्याईएको छ।

समाचार अनुसार २००३ सालमा धादिङको केबलपुरमा जन्मिएका स्वामी डा. गिरीले २०४१ सालमा जनक दर्शनमा पीएचडी गरेका थिए । ०४७ सालमा १००८ स्वामी महामण्डलेश्वर महेषानन्द गिरीजी महाराजबाट संन्यास लिएका उनले ०५० सालमा एकल प्रयासबाट देवघाटमा महेश संस्कृत गुरुकुल विद्यापीठ स्थापना गरेका थिए ।

आफ्नो जीवन नै संस्कृत र संस्कृतिका लागि समर्पण गर्नुभएका डा. गिरीले देवघाटमा कक्षा ६ देखि आचार्य (एमए) तहसम्मको अध्ययन–अध्यापन हुने विशाल गुरुकुल स्थापना गरेका छन् । उनले सञ्चालन गरेका गुरुकूल देवघाटका अतिरिक्त पोखरा, काठमाडौं, बनेपा, झापालगायत स्थानमा सञ्चालनमा छन् ।

वैदिक वाङ्मय एवं संस्कृतिका विशेषज्ञ स्वामी डा. गिरीले नेपाल मात्र नभई अमेरिकालगायत विभिन्न मुलुकमा समेत धार्मिक, आध्यात्मिक प्रवचन दिएका थिए । संस्कृति र धर्म भनेपछि हुरुक्कै हुने स्वामी डा. गिरी शांकर वेदान्तमा विशेष प्रवचन दिन्थे । उनको जीवन नै शिक्षा र हिन्दु धर्म संस्कृतिका लागि समर्पित हुँदै आएको थियो।

उनका २० वटाभन्दा बढी पुस्तक प्रकाशित छन् । त्यसमध्ये आठ खण्ड र पाँच हजार पानामा विभाजित श्रीमद् भागवत महापुराण (नेपाली भावानुवाद) सबैभन्दा महत्वपूर्ण छ।