मकवानपुरको बागमतीमा ४ बर्षीया बालिकाको हत्या: २ जना पक्राउ

४ मंसिर, हेटौँडा । मकवानपुरको पुर्वी क्षेत्रमा पर्ने बागमती गाउँपालिकामा वडा नम्बर -७ मा ४ बर्षीया बालिकाको हत्या भएको छ । बागमती गाउँ पालिका वडा नम्बर-७ लामीटार बस्ने सेर बहादुर पाख्रिनकी ४ बर्षीया छोरी रुबिना पाख्रिनको हत्या गरिएको हो।यता हत्यामा संलग्न २ जनालाई मकवानपुर प्रहरीले पक्राउ गरेको छ। 

जिल्ला प्रहरी कार्यालय मकवानपुरका प्रहरी प्रवक्ता डिएसपी इन्द्र बहादुर रानाले घटनाको प्रकृति हेर्दा ४ बर्षीया बालिकालाई ढुङ्गा हानेर हत्या गरेको हुन सक्ने र घटनामा संलग्न भएको आशंकामा  २ जनालाई राति नै पक्राउ गरिसकेको प्रष्ट खबरलाई बताएका छन्। 

'घटनास्थलमा भेटिएको ढुङ्गामा रगत लतपतिएको र घटनाको प्रकृति हेर्दा ढुङ्गाले हानेर हत्या गरेको जस्तो देखिन्छ,घटनामा संलग्न २ पुरुषलाई पक्राउ गरिसक्यौ'- डिएसपी रानाले भने।

डिएसपी राना सहितको टोली घटनास्थलमा रहेको र घटनाको अनुसन्धान भइरहेको जनाइएको छ। मकवानपुर बागमती गाउँ पालिका वडा नम्बर-७ लामिटार बस्ने सेर बहादुर पाख्रिनकी ४ बर्षीया छोरी रुबिना पाख्रिन  हिजो दिउँसो घरबाट हराएको र उनलाई स्थानीय मोन्छाई खोलामा रगताम्मे अवस्थामा उद्धार गरी उपचारका लागि हेटौँडा अस्पताल ल्याईएकोमा मृत्यु भएको थियो। बालिकाको शव पोष्टमार्टमका लागि हेटौँडा अस्पतालमा रहेको जनाइएको छ।