सालको काठ सदुपयोग गर्न पाउनुपर्ने मागसहित ज्ञापनपत्र

१५ मंसिर, हेटौंडा । सामुदायिक वन समूहमा कटान भएका सालको काठ सदुपयोग गर्न पाउनुपर्ने भन्दै राप्ति डिभिजन वन कार्यालय मनहरीमा ज्ञापनपत्र बुझाईएको छ । सामुदायिक वन उपभोक्ता महासंघ (फेकोफन) मकवानपुरको आयोजनामा सोमबार कार्यालयमा ज्ञापनपत्र बुझाईएको हो । 
सामुदायिक वन उपभोक्ता महासंघ मकवानपुरका अध्यक्ष साधुराम चौलागाईले डिभिजनल वन अधिकृत दिर्घनारायण कोइरालालाई १२ बुँदे ज्ञापनपत्र बुझाएका हुन् । ज्ञापनपत्र बुझ्दै कोइरालाले फेकोफनले बुझाएको ज्ञापनपत्र सम्बन्धित निकायमा पुर्याउने प्रतिवद्धता व्यक्त गरे । कार्यक्रममा फेकोफन बागमती प्रदेश सदस्य रामहरी चौलागाई, हेटौंडा नगर अध्यक्ष शम्भुप्रसाद न्यौपाने, मनहरीपालिका अध्यक्ष हेमराज उप्रेति लगायतले सामुदायिक वन माथि गरिएको अनावश्यक कडाईका कारण कटान भएका काठ कुहिन थालेको र उपभोक्ता काठ नपाएर मारमा परेको भन्दै काठ विक्रिवितरण तथा ओसारपसारमा लगाइएको प्रतिवन्ध फुकुवा हुनुपर्ने बताएका थिए । 
कार्यक्रममा विभिन्न सामुदायिक वन उपभोक्ता समूहका प्रतिनिधिहरुको सहभागिता रहेको थियो । फेकोफन मकवानपुरले आफ्नो मागको बारेमा प्रदेश सरकारदेखि स्थानीय तहसम्म ज्ञापनपत्र बुझाउने कार्यक्रमलाई निरन्तरता दिईरहेको छ ।