सरकारका कारण सडकमा असन्तुष्टिः प्रतिपक्षी दल

२३ मंसिर, हेटौंडा । सडकमा देखिएको असन्तुष्टि प्रणाली र लोकतन्त्रको खराबी नभई सरकार सञ्चालन गर्नेहरुको खराबीले देखिएको नेताहरुले बताएका छन् । 
प्रधानमन्त्री केपी शर्मा ओलीको आव्हानमा बसेको सर्वदलीय बैठकमा उपस्थित प्रतिपक्षी दलका नेताहरुले सरकारका गलत कामको परिणामस्वरुप सडकमा असन्तुष्टि देखिएको बताएका हुन् ।
बैठकपछि पत्रकारहरुसँग कुराकानी गर्दै कांग्रेस सहमहामन्त्री प्रकाशशरण महतले सरकारले गरेका गलत कामको परिणामस्वरुप सडका असन्तुष्टि देखिएको कुरा कांग्रेसले राखेको जानकारी दिए । 
उनले सरकारले आफू भन्दा फरक विचार राख्नेहरुमाथि गरेको दमनकारी व्यवहारबाट आजित भएर पनि सडका असन्तुष्टि देखा परेको कुरा राखेको बताए ।
सरकारले लोकतान्त्रिक संस्थाहरुलाई चलाएर लोकतान्त्रिक संविधानको मर्म विपरित काम गरेकाले पनि समस्या उत्पन्न भएको उल्लेख गर्दै नेता महतले सरकार सच्चिएर लोकतान्त्रिक पद्धतिको मर्म अनुसार काम गरे कुनैपनि विरोध प्रदर्शन नहुने कुरा राखेको जानकारी दिए ।
यस्तै राष्ट्रिय प्रजातन्त्र पार्टी (राप्रपा)का नेताहरुले पनि आफ्नो कुरा स्पष्टसँग राखेको तर कुनैपनि नेताहरुबाट प्रतिक्रिया नआएको बताए । 
राप्रपा नेता दीपक बोहराले सर्वदलीय बैठक राखेर राजा सहितको लोकतन्त्र र हिन्दु राष्ट्र कायम गर्ने विषयमा छलफल गर्न प्रस्ताव गरेको जानकारी दिँदै राजतन्त्रको पक्षमा भएको आन्दोलनमा आफूहरुको नैतिक समर्थन रहेको बताए ।