बागमती प्रदेशसभाबाट प्रकाशित पुस्तक सार्वजनिक

२४ मंसिर, हेटौंडा । बागमती प्रदेशसभा सचिवालयबाट प्रकाशन भएका दुई पुस्तक बुधबार सार्वजनिक गरिएको छ । सचिवालयबाट प्रकाशित 'प्रदेशसभाबाट पारित विधेयक संग्रह (संशोधनसहित एकिकृत)' र 'टेलिफोन डाइरेक्ट्री' सार्वजनिक गरिएको हो । 
प्रदेशसभा सचिवालयमा भएको पत्रकार सम्मेलनमा सभामुख सानुकुमार श्रेष्ठ र उपसभामुख राधिका तामाङले पुस्तक सार्वजनिक गरेका छन् । कार्यक्रममा प्रदेशसभा सचिव कृष्णहरि खड्काले प्रदेशसभाले अहिलेसम्म गरेका गतिविधिहरुको बारेमा जनकारी दिएका थिए । पहिलोदेखि छठौं अधिवेशनसम्म बागमती प्रदेशसभाको १७६ वटा बैठक बसेका छन् भने कार्यव्यवस्था परामर्श समितिको बैठक ७५ वटा बसेको छ ।
छैठौं अधिवेशनमा मात्रै २४ वटा प्रदेशसभा बैठक र ७ वटा परामर्श समिति बैठक बसेको छ । यो अधिवेशनमा १० वटा विधेयक र २ वटा अध्यादेश पारित भएको छ । कोरोना संक्रमणको महामारीको अवधीमा प्रदेशसभाले विषयगत समितिको बैठक र अन्तरक्रिया गरेको जनाईएको छ । त्यस्तै भिडियो कन्फ्रेन्समार्फत कार्यव्यवस्था परामर्श समितिको बैठक, काठमाडैंमा गोष्ठी लगायतका काम भएको जनाईएको छ । पत्रकार सम्मेलनमा संसद सचिवालयका कर्मचारीहरुको पनि उपस्थिति रहेको थियो ।