भोलिदेखि मतदाता नामावली संकलन

मतदाता नामावली दर्ता तथा दाबी बिरोध कार्यक्रमको बारेमा जानकारी गराउदै जिल्ला निर्वाचन कार्यालय मकवानपुरका प्रमुख गोविन्द पौडेल

   ३१ असार,हेटौडा । निर्वाचन आयोगले आगामी प्रदेशसभा र प्रतिनिधिसभा सदस्य निर्वाचन प्रयोजनका लागि यही साउन १ गते आइतबारबाट सबै जिल्ला स्थित निर्वाचन कार्यालयहरूमा मतदाता नामावली संकलन गर्ने भएको छ ।

निर्वाचन आयोगको निर्णय अनुसार जिल्ला निर्वाचन कार्यालय मकवानपुरले पनि जिल्लामा बसोबास गरी मतदाता नामावालीमा नाम छुट भएकाहरुको लागि साउन १ गतेदेखि जिल्ला निर्वाचन कार्यालयबाट नयाँ मतदाता नामावली संकलन गर्ने  भएको छ ।
शुक्रबार जिल्ला प्रशासन कार्यालयमा राजनीतिकर्मी र सञ्चारकर्मीहरुसँग  अन्तरक्रिया कार्यक्रमको आयोजना गर्दै  निर्वाचन कार्यालयले मकवानपुर जिल्लाका आठ गाउँपालिका तथा एक नगरपालिका र एक उपमहानगरपालिका क्षेत्रका मतदातान गर्न योग्य  नयाँ मतदाताको नामावली संकलन गरिने बताएको हो ।
जिल्ला निर्वाचन कार्यालय मकवानपुरका प्रमुख गोविन्द पौडेलले साउन १ गतेबाट १५ गते सम्म मतदाता नामावली संकलन गरिने १६ देखि २० गतेसम्म मतदाता नामावलीमा दावी बिरोध गर्न सकिने व्यवस्था गरिकोे बताए । 
साथै पाडेलले यस अघि प्रकाशित नामावलीमा आफ्नो नाम तथा ठेगानामा कुनै त्रुटी भएको भए त्रुटी सच्याउन, दोहोरो नाम हटाउन वा सार्न, मतदाता नामावलीबाट नाम हटाउन समेत सम्बन्धित जिल्ला निर्वाचन कार्यालयमा निवेदन दिन सकिने र  सम्बन्धित वडामा बसोबास गर्ने व्यक्तिको नागरिकता, विवाहिता महिलाका हकमा विवाह दर्ता एवं अन्य जिल्लाबाट बसाइँ सरी आएका व्यक्तिका परिवारले बसाइँसराइ दर्ताको प्रमाण ल्याएमा नयाँ मतदाता नामावलीमा नाम समावेश हुने बताए । 

राजनीतिकर्मी र सञ्चारकर्मीहरुसँग गरिएको अन्तरक्रियामा प्रमुख जिल्ला अधिकारी दुवाडी ,स्थानिय विकास अधिकारी नारायण मैनाली , नेपाली काँग्रेस मकवानपुरका कार्यवाहक सभापति विष्णु लामिछाने नेकपा एमालेका जिल्ला अध्यक्ष मुनु सिग्देल , माओबादी केन्द्र का मकवानपुरका संयोजक प्रेम बहादुर पुलामी, राष्ट्रिय प्रजातन्त्र पार्टी मकवानपुरका हेटौंडा नगर अध्यक्ष गुरुप्रसाद सापकोटा, नयाँ शक्ती पार्टी नेपाल मकवानपुरका सह–संयोजक जिवनमान मोक्तान, संघीय समाजवादी फोरम मकवानपुरका अध्यक्ष शुभरत्न गोले सहित विभिन्न संचार माध्यमा आवद्ध संचारकर्मीहरुको उपस्थिति रहेको थियो । सहभागी राजनीतिकर्मीले मतदाता अद्यावधिक गर्न १५ दिनको अवधि पर्याप्त नभएको बताएका थिए  भने कार्यालय मकवानपुरका प्रमुख गोविन्द पौडेलले मतदाता नामावली संकलन र  दावी बिरोध गर्ने कार्यका बारेमा जानकारी गराएका थिए ।