माओवादीबाट मन्त्री बन्नेको टुंगो लाग्यो

११ साउन, काठमाडौं । प्रधानमन्त्री शेरबहादुर देउवाले विस्तार गर्न लागेको मन्त्रीपरिषदमा सत्तारुढ नेकपा माओवादी केन्द्रले पार्टीबाट सहभागी हुनेहरूको नाम देउवालाई बुझाएको छ । 
पार्टी हेडक्वार्टर बैठकले मन्त्रिपरिषदमा सहभागी हुनेहरूको नाम टुंग्याएर प्रधानमन्त्री देउवालाई नामावली बुझाएको प्रधानमन्त्रीका स्वकीय सचिव केशव जोशीले बताए । माओवादी केन्द्रबाट गिरिराजमणि पोखरेलले स्वास्थ्य, महेन्द्रबहादुर शाहीले उर्जा, आशा खनालले महिला तथा बालबालिका, शिव मण्डलले आपूर्ति, सन्तकुमार चौधरी पशुपंक्षी विकास र टेकबहादुर बस्नेत सामान्य प्रशासन मन्त्रालय सम्हाल्नेछन् । यसअघि माओवादी केन्द्रबाट उपप्रधानमन्त्री एवं परराष्ट्रमन्त्री कृष्णबहादुर महराको नेतृत्वमा गृहमन्त्री जनार्दन शर्मा र सहरी विकास मन्त्रीमा प्रभु साह सरकारमा गईसकेका छन् ।
यसअघि, मन्त्री बन्ने बताईएका मकवानपुरका सांसद रामनारायण विडारीको नाम भने यसपटक पनि मन्त्रीपरिषदमा अटेन । उनलाई मन्त्री बनाउने बारेमा पार्टीमा यसअघि चर्चा भएपनि अन्तिममा भने उनी ‘आउट’ भएका छन् । पार्टीले राज्यमन्त्री समेत थप्ने भएकाले अहिले नै उनको सम्भावना भने नटरेको माओवादी केन्द्र मकवानपुरका एक नेताले बताए । उनका अनुसार राज्यमन्त्री बन्ने वा नबन्ने निर्णय भने विडारीले नै लिने जनाईएको छ ।