देउवा मन्त्रीपरिषदमा १९ मन्त्री थपिए

११ साउन, काठमाडौं । आफु निर्वाचित भएको डेढ महिनापछि प्रधानमन्त्री शेरबहादुर देउवाले मन्त्रिपरिषद् विस्तार गरेका छन् । देउवा मन्त्रीपरिषदमा आज १९ जना सदस्य थप गरेका हुन् । नवनियुक्त मन्त्रीहरुले बुधबार शितल निवासमा आयोजित एक समारोहबीच राष्ट्रपति विद्या भण्डारीसमक्ष पद तथा गोपनियताको शपथ लिएका छन् ।
नवनियुक्त मन्त्रीहरुमध्ये नेपाल कांग्रेसबाट भीमसेनदास प्रधान रक्षा, वीरबहादुर बलायर भौतिक पूर्वाधार तथा यातायात, यज्ञबहादुर थापा  कानुन, मीन विश्वकर्मा वाणिज्य, मोहन बस्नेत सूचना तथा सञ्चार, सञ्जय गौतम सिँचाई, रामकृष्ण यादव कृषि, राजन केसी युवा तथा खेलकुद, अम्बिका बस्नेत सहकारी तथा गरिबी निवारण र महेन्द्र यादवलाई खानेपानी तथा सरसफाई मन्त्रीको जिम्मेवारी दिईएको छ ।
यसैगरी, माओवादी केन्द्रबाट गिरिराजमणि पोखरेल स्वास्थ्य, महेन्द्रबहादुर शाही ऊर्जा मन्त्री, टेकबहादुर बस्नेत सामान्य प्रशासन, शिवकुमार मण्डल आपूर्ति, सन्तकुमार थारु चौधरी  पशुपन्छी विकास र आशा खनाल कोइरालालाई महिला तथा बालबालिका मन्त्रीको जिम्मेवारी दिईएको छ ।
नेपाल लोकतान्त्रिक फोरमबाट जितेन्द्रनारायण देव संस्कृति, पर्यटन तथा नागरिक उड्डयन र गोपाल दहित भूमिसुधार मन्त्री भएका छन् । नेकपा संयुक्तबाट मिथिला चौधरी जनसंख्या तथा वातावरण भएका छन् । देउवाले यसअघि कांग्रेसबाट गोपालमान श्रेष्ठ, माओवादीबाट कृष्णबहादुर महरा र फोरमबाट विजयकुमार गच्छदार उपप्रधानमन्त्रीसहित ७ सदस्यीय मन्त्रिपरिषद् गठन गरेका थिए ।

तस्विर साभार: इकान्तिपुर