बागमती प्रदेशसभाः संसद चलाउन दल सहमत, सभामुखको आनाकानी

८ माघ, हेटौंडा । बागमती प्रदेशसभाको प्रदेशसभा बैठक संचालनका लागि प्रदेशसभामा रहेका सबै दल सहमत भएपनि सभामुख सानुकुमार श्रेष्ठले आनाकानी गरेका छन् । बैठक संचालनका लागि साढे ४ घण्टा बसेको कार्यव्यवस्था परामर्श समिति बैठकमा प्रदेशसभा संचालनका लागि सहमत भएपनि सभामुख श्रेष्ठले आनाकानी गरेका हुन् । 
‘संसदमा रहेका सबै दलका सदस्यहरुले शुक्रबार ११ बजे बैठक संचालन हुनुपर्ने पक्षमा मत राखेका थिए’–नेपाली कांग्रेसका सचेतक छिरिङदोर्जे लामाले भने–‘तर सभामुखले थप छलफल गर्नुपर्ने भने पछि बैठक कहिले संचालन हुने अनिश्चित भएको छ ।’ कांग्रेसले शुक्रबारको बैठकमा अविश्वासको प्रस्ताव टेबुल गरी पर्याप्त छलफलका लागि समय तोक्दा उपयुक्त  हुने धारणा राखेको र अन्य दलले समेत सहमति जनाएको लामाको भनाई छ । तर सभामुख श्रेष्ठले छलफल गर्नुपर्ने भन्दै बैठक बोलाउन असहमत भएका थिए । शुक्रबारको बैठकमा मूख्यमन्त्री डोरमणी पौडेल विरुद्ध अविश्वासको प्रस्ताव दर्ता टेबुल हुने भएकाले सभामुख श्रेष्ठले यसलाई पर धकेल्न खोजेको बैठकमा सहभागीहरुको अनुमान छ । 
अविश्वासको प्रस्तावका प्रस्तावक नेकपाका सांसद शालिकराम जम्कट्टेलले मूख्यमन्त्रीविरुद्ध अविश्वासको प्रस्ताव दर्ता भएको अवस्थामा उनकै मन्त्री रामेश्वर फुँयाललाई कार्यव्यवस्था परामर्श समितिमा राखेर छलफल गरेको भन्दै सभामुखको चर्को आलोचना गरेका थिए । उनले सभामुखको भूमिकामाथि नै प्रश्न उठाएका थिए ।
यसअघि, अविश्वासको प्रस्ताव सम्बन्धी कार्यविधि समस्यौदा समितिको बैठकले कार्यविधिलाई टुंगो लगाएको संयोजक छिरिङदोर्जे लामाले जानकारी दिए ।