बागमती प्रदेश:मुख्यमन्त्री पौडेललाई हटाइ अष्टलक्ष्मीलाई बनाउन प्रस्ताव

९ माघ,हेटौँडा । बागमती प्रदेशका मुख्यमन्त्री डोरमणि पौडेललाई हटाइ अष्टलक्ष्मी शाक्यलाई  मुख्यमन्त्री बनाउन प्रस्ताव गरिएको छ। 

वाग्मती प्रदेशसभामा मुख्यमन्त्री डोरमणि पौडेलविरूद्ध दर्ता भएको अविश्वासको प्रस्ताव टेबुलका क्रममा अष्टलक्ष्मी शाक्यलाई मुख्यमन्त्री बनाउने प्रस्ताव गरिएको हो। 

प्रदेशसभाको शुक्रबारको बैठकमा संसदमा अविश्वासको प्रस्ताव टेबुल गर्न पहिलो हस्ताक्षरकर्ता दाहाल–नेपाल समूहका सांसद अरूण नेपालले  अविश्वासको प्रस्ताव टेबुल गरेका हुन् ।

उनले समृद्धिका लागि गठन भएको प्रदेश सरकारको काम हेर्दा शिर निहुराउनुपर्ने अवस्था आएको बताए । उनले आफुले मन्त्री हुँदा गर्न खोजेका कामबारे फेहरिस्त सुनाउँदै नीति कार्यक्रम र बजेटमा समावेश गरेको भन्दै आक्रोश पोखे।उनले संघीयतामाथि दिनदाहडै आक्रमण गर्ने काम भएको बताए।प्रधानमन्त्री केपिशर्मा ओलीले प्रदेश संघको इकाई भनेर अपमान गरेको उनको भनाइ थियो । 

आफुहरूले यस्तो अवस्थाबाट मुक्त हुनुपर्ने मान्यताका आधारमा अष्टलक्ष्मी शाक्यलाई संसद दलको नेता चयन गरेको उनले बताए ।उनले डोरमणि पौडेल नेतृत्वको प्रदेश सरकारले जनताको सर्वोपरी हितमा अपेक्षाकृत ढंगले काम नगरेकाले अविश्वासको प्रस्ताव दर्ता गरिएको बताए ।प्रदेशसभाको बैठक माघ १९ गते २ बजे बस्नेगरी स्थगित भएको छ ।