प्रहरीको परामर्श कक्ष शुभारम्भ

१२ साउन, हेटौँडा । जिल्ला प्रहरी कार्यालय मकवानपुरले आफ्नो परिसरमा स्थापना भएको परामर्श कक्ष शुभारम्भ गरेको छ । विभिन्न खाले परामर्शका लागि स्थापना भएको कक्ष औपचारिक रुपमा विहिबारबाट शुभारम्भ भएको हो । 
लागुऔषध दुव्यर्सन र मादनपदार्थ सेवनमा पक्राउ परेकाहरुलाई कक्षमा परामर्श दिने जनाईएको छ । शुभारम्भ कार्यक्रममा प्रहरी निरीक्षक प्रकाश श्रीमलले प्रहरीले नियन्त्रणमा लिएका लागुऔषध प्रयोगकर्ताहरुलाई परामर्श दिएका थिए । उनले लागुऔषध दुव्यर्सनबाट स्वास्थ्यमा पर्ने असर, सामाजिक र आर्थिक क्षेत्रमा पर्ने नोक्सानी, कानूनी पक्ष, कुलत छोड्ने उपायहरुको बारेमा जानकारी दिएका थिए । 
लागुऔषध र मादकपदार्थ सेवनकर्तालाई कारवाही मात्रै नभई परामर्श समेत दिनुपर्छ भन्ने उद्देश्यले कक्षको स्थापना गरेको मकवानपुरका प्रहरी नायव उपरीक्षक बामदेव गौतमले बताए । उनका अनुसार प्रहरीले आव ०७३/०७४ मा ६ सय भन्दा बढि लागुऔषध दुव्यर्सनी र मादक पदार्थलाई नियन्त्रणमा लिएको थियो । 
प्रहरीले लागुऔषधको कारोबार र प्रयोग नियन्त्रणका लागि प्रहरी निरीक्षक मधु थापाको नेतृत्वमा टिम नै परिचालन गरेको छ । टोलीले पछिल्लो ४ महिनामा १ सय ६५ जनालाई नियन्त्रणमा लिई परामर्श दिईएको छ । पक्राउ पर्नेका मध्ये गाँजा सेवनकर्ता बढि पाईएको छ । नियन्त्रणमा लिईएकालाई परामर्श दिन कक्षको अभाव थियो भने अब सहज हुने प्रहरीको भनाई छ ।