प्रधानमन्त्री कप क्रिकेटः एपीएफ सेमिफाइनलमा

११ माघ, हटौंडा । राजधानिमा जारी प्रधानमन्त्री कप एकदिवसीय पुरुष क्रिकेट प्रतियोगितामा विभागीय टिम एपीएफले लगातार तेस्रो जित निकालेको छ ।
कीर्तिपुरस्थित टियु क्रिकेट मैदानमा शनिबार कर्णाली प्रदेशलाई ७१ रनले पराजित गर्दै एपीएफले लगातार तेस्रो जित निकालेको हो । जितसंगै एपीएफ समूह ’ए’ बाट सेमिफाइनलमा प्रवेश गरेको छ । कर्णालीको हारले अर्को विभागीय टिम त्रिभुवन आर्मी क्लब समेत सेमिफाइनलमा पुगेको छ ।
एपीएफले दिएको २ सय १९ रनको लक्ष्यसहित जवाफी ब्याटिङ गरेको कर्णाली ४३ ओभर २ बलमा अलआउट हुँदै १ सय ४७ रन मात्र बनाउन सक्यो । कर्णालीका हेमन्त ओलीले ५८ रनको अर्धशतकीय इनिङ्स खेलेपनि टोलीलाई जित दिलाउन सकेनन् ।
टस जितेर पहिले ब्याटिङ गरेको एपीएफले ४९ ओभर ५ बलमा अलआउट हुँदै २ सय १८ रन बनाएको थियो । एपीएफको लागि सन्दीप जोराले ६० रनको अर्धशतकीय इनिङ्स खेले । यस्तै अमर रौटेलाले ३१ रन जोड्दा सुवास खकुरेलले २३ रन बनाए । 
कर्णालीका कप्तान रविन्द्र शाही र अनुज चुनाराले ३ ÷ ३ विकेट लिए । दिवन पुन र राज साहले २ ÷ २ विकेट लिए । जितसंगै समूह ’ए’ को एपीएफले ३ खेलमा ६ अंक जोडेको छ । एपीएफ तालिकाको शीर्ष स्थानमा समेत उक्लिएको छ ।