प्रदशसभा र प्रतिनिधिसभाको निर्वाचन एकैपटक गर्न असम्भवः निर्वाचन आयोग

१५ साउन, हेटौँडा । प्रमुख निर्वाचन आयुक्त डा. अयोधीप्रसाद यादवले आगामी प्रदेशसभा र प्रतिनिधिसभाको निर्वाचन एकैसाथ गर्न नसकिने स्पष्ट पारेका छन् । व्यवस्थापिका–संसद् सुशासन तथा अनुगमन समितिको आइतबारको बैठकमा उनले संवैधानिक र व्यवस्थापकीय दृष्टिले पनि प्रदेशसभा र प्रतिनिधिसभाको निर्वाचन एकैपटक गर्न नसकिने बताएका हुन् ।
उनले बैठकमा दुबै निर्वाचन एकैपटक गर्दा संविधानले परिकल्पना गरेको महिलाको प्रतिनिधित्व सुनिश्चित गर्न नसकिने स्पष्ट पारे ।निर्वाचनलाई स्वतन्त्र, निष्पक्ष र भयरहित तुल्याउन निर्वाचनसम्बन्धी अन्तर्राष्ट्रिय मापदण्डको पालना गर्नुपर्ने अवस्थालाई सबै सरोकारवाला पक्षले हेक्का राख्न जरुरी रहेको प्रमुख निर्वाचन आयुक्त यादवले बताए ।
मतपत्रलगायत निर्वाचन सामग्रीको उत्पादन, ढुवानी, मतदाता शिक्षा, जनशक्तिको बन्दोबस्ती, मतदाता नामावली संकलन, मतदानस्थलको व्यवस्थापन जस्ता कारण पनि एकै पटक दुईवटा निर्वाचन असम्भव रहेको उनको भनाई थियो ।
बैठकमा समितिका सभापति मोहनसिंह राठौरले एकैचरणमा चुनावको कुरा व्यापकरुपमा उठेकाले यस विषयमा चुनाव आयोगको धारणा सार्वजनिक हुन आवश्यक रहेको विचार व्यक्त गरेका थिए ।  बैठकमा सांसद उदय नेपाली, जनकराज जोशी, मिलन राजवंशी, हर्कबोल राई लगाएतको उपस्थिति रहेको थियो ।