हेटौंडामा हुने मेयर कप फुटबलको मिति परिवर्तन

३ फागुन, हेटौंडा । हेटौंडा उपमहानगरपालिका खेलकुद विकास समितिको आयोजनामा हुने तयारी गरिएको मेयर कप फुटबल प्रतियोगिता–२०७७ को मिति परिवर्तन भएको छ । यसअघि फागुन ५ गतेबाट गर्ने भनिएको फुटबल प्रतियोगिता प्राविधिक कारणले मिति परिवर्तन गरिएको हो ।
हेटौंडा–४ स्थित लोकतान्त्रिक मैदान (हुप्रचौर) सञ्चालन हुने प्रतियोगिता फागुन १४ गतेबाट २४ गतेसम्म सञ्चालन गर्ने सोमबार बसेको आयोजक समितिको बैठकले निर्णय गरेको हो । नगर खेलकुद विकास समिति हेटौंडा उपमहानगरपालिकाको आयोजनामा हुन लागेको प्रतियोगितामा १९ वटा टोलीको सहभागिता रहने भएको छ ।
प्रतियोगितामा हेटौंडा उपमहानगरको १९ वटै वडाको सहभागिता रहने समिति अध्यक्ष चन्द्र शाहीले जानकारी दिए । उनका अनुसार प्रतियोगिताको तयारी तीब्ररुपमा अगाडि बढिरहेको छ । ‘मैदान निर्माण, प्राविधिक तयारी तथा वडा तहमा टिम निर्माणका लागि हामीले समन्वय गरेर काम गरिरहेका छौं ।’, अध्यक्ष शाहीले भने ।
उनका अनुसार प्रतियोगिताका लागि प्रचारप्रसार तथा खेल तालिका निर्माणको तयारी अन्तिम चरणमा पुगेको छ । प्रतियोगिताको विजेतालाई नगद दुईलाख रुपैयाँ, उपविजेताले नगद एकलाख ५० हजार रुपैयाँ सहित शिल्ड, मेडल र प्रमाणापत्र प्राप्त गर्नेछन् । 
यस्तै प्रतियोगिताका सर्वोत्कृष्ट खेलाडीलाई नगद दशहजार रुपैयाँ, उत्कृष्ट डिफेन्डर, मिडफिल्डर, गोलरक्षक, प्रशिक्षक तथा सर्वाधिक गोलकर्तालाई जनही पाँच÷पाँचहजार रुपैयाँ प्राप्त गर्नेछन् ।