सभामुखले कांग्रेसले समय मागेको बहाना बनाउनु गलतः बानियाँ

७ फागुन, हेटौंडा । नेपाली कांग्रेस बागमती प्रदेश संसदीय दलका नेता इन्द्रबहादुर बानियाँले बागमती प्रदेशसभाका सभामुख सानुकुमार श्रेष्ठले संसद स्थगित हुनुको दोष कांग्रेस र कार्यविधि मस्यौदा समितिलाई लगाउनु गलत भएको बताएका छन् । 
पत्रकार सम्मेलन गरेर सभामुख श्रेष्ठले कार्यविधि मस्यौदा समितिको प्रतिवेदन नआएको र कांग्रेसले समय मागेकाले बैठक स्थिगत गरेको बताएका थिए । त्यसको प्रतिक्रिया दिंदै नेता बानियाँले विना परामर्श सूचना टाँसेर संसद स्थगित गर्ने कामको प्रतिरक्षाका लागि कांग्रेसलाई समेत मुछेर सभामुख श्रेष्ठले आफ्नो पदको गरिमा घटाउने काम गरेको बताए । उनले मंगलबार भएको छलफलमा सबैले संसद सूचना टाँसेर स्थगित गर्दा सभामुखको भूमिकामाथि प्रश्न उठेको भन्दै सुचारु गर्नुपर्ने सहमति भएको बताए । 
उनले फागुन ५ गतेदेखि केही दिन संसद संचालन गर्ने र कांग्रेसलाई समय आवश्यक परे राजनैतिक सहमति गरेर स्थगित गर्ने कुरा भएको बताए । ‘आफु परामर्श समितिमा छलफल नै नगरेर सूचना टाँसेर संसद स्थगित गर्ने अनि त्यसको प्रतिपक्षाका लागि कांग्रेसले समय मागेको भनेर बहाना बनाउनु गलत हो ।’–उनले भने–‘यसले सभामुख पदको ओझ र गरिमा घट्छ ।’
कांग्रेस संसदमा टेबुल भएको मूख्यमन्त्री डोरमणि पौडेलमाथिको अविश्वासको प्रस्तावमाथिको छलफल अघि बढाउनुपर्ने पक्षमा रहेको बानियाँको भनाई छ ।

यो पनि पढ्नुस्
कार्यविधि नहुँदा संसद चलाउन समस्याः सभामुख श्रेष्ठ