एसपी लामाले भने–‘मकवानपुरबासीलाई धन्यवाद’

१८ साउन, हेटौँडा । मकवानपुरका प्रहरी उपरीक्षक (एसपी) बसन्तकुमार लामाले मकवानपुरले आफुलाई राम्रो पहिचान दिएको भन्दै मकवानपुरबासीलाई धन्यवाद दिएका छन् ।

प्रहरी बरिष्ठ उपरीक्षकमा बढुवा सिफारिस भई सरुवा हुन लागेका उपरीक्षक लामाले बुधबार पत्रकारहरुसँग विदाई भेट गर्दै आफ्नो ८ महिने कार्यकालमा राम्रो सहयोग गरेको भन्दै जिल्लाबासीलाई धन्यवाद दिएका हुन् । पत्रकार सम्मेलनमा लामाले आफ्नो २३ बर्षे जागिरे जीवनमा मकवानपुरमै रहँदा विभुषण पाउनु, यसअघि पटक पटक नपरेपनि मकवानपुरमै रहँदा बढुवा हुनु जस्ता कारण मकवानपुरको कार्यकाल जीवनमा स्मरणीय रहने बताए ।

उनले मकवानपुरमा रहँदा लागुऔषध नियन्त्रण लगायतका क्षेत्रमा जोड दिएका काम गरेको भन्दै केही काम सडक विस्तार र निर्वाचनमा केन्द्रीत हुनुपर्दा गर्न नसकेको भन्दै आफुले तयार पारेको कार्ययोजना अनुसार नयाँ प्रहरी प्रमुखले काम गर्ने विश्वास व्यक्त गरे । 
मकवानपुरका प्रमुख ३ समस्या
लामाले छोटो कार्यकालमा जिल्लामा प्रमुख तीन समस्या देखेको बताए । उनका अनुसार मकवानपुरको मूख्य समस्या लागुऔषध नै हो । उत्पादन, ओसारपसार र सेवनका दृष्टिकोणले लागुऔषध मकवानपुरको मूख्य समस्या रहेको उनको भनाई छ । हेटौँडा बाहिरबाट जति सुन्दर देखिन्छ, लागुऔषधले त्यति नै प्रभावित छ ।

लामाले सवारी दुर्घटनालाई पनि अर्को प्रमुख समस्याका रुपमा औल्याएका छन् । प्रत्येक दिन हुने दुर्घटना अर्को समस्या हो । ट्राफिक नियम पालनामा वेवास्ता, सवारी चाप बढि हुनु, साँघुरो सडक र सडकको जिर्ण अवस्था दुर्घटनाका कारण रहेको उनको भनाई छ । एसपी लामाले औल्याएका मकवानपुरको अर्को समस्या आत्महत्या रहेको छ । उनले यसका लागि सबैले सचेतनाका कार्यक्रम अघि बढाउनुपर्नेमा जोड दिए ।

पत्रकार सम्मेलनमा प्रहरी नायव उपरीक्षक बामदेव गौतम, प्रहरी निरीक्षक मधु थापा, नेपाल पत्रकार महासंघका अध्यक्ष हरि हुमागाई लगायतको सहभागिता रहेको थियो । लामा २०७३ मंसिर १३ गते मकवानपुर सरुवा भई आएका थिए ।