मेयरकप फुटबलः वडा नम्बर १८ र ५ अघिल्लो चरणमा

१८ फागुन, हेटौंडा । हेटौंडाको हुप्रचौरमा जारी मेयरकप फुटबल प्रतियोगितामा हेटौंडा उपमहानगरापलिकाको वडा नम्बर ५ र १८ सोमबार भएको खेलमा जित निकाल्दै अघिल्लो चरणमा प्रवेश गरेका छन् ।
सोमबार भएको पहिलो खेलमा वडा नम्बर १८ ले वडा नम्बर १२ लाई २–१ गोल अन्तरले पराजित गर्दे अघिल्लो चरणमा स्थान बनाएको हो । १८ नम्बरका लागि सुनिल घलान र विमल घलानले एक एक गोल गरे । वडा नम्बर १२ को तर्फबाट शम्भु पुडासैनीले एक गोल फर्काए । खेलमा वडा नम्बर १८ का रोशन मोक्तान खेलको म्यान अफ द म्याच भए । 
यस्तै सोमबार नै भएको दोस्रो खेलमा संघर्षपूण जित निकाल्दै वडा नम्बर ५ अघिल्लो चरणमा पुगेको छ । वडा नम्बर ५ ले वडा नम्बर ८ लाई सडनडेथमा पराजित गरेको हो । 
निर्धारित समयको खेलमा दुबै टोलीले १–१ गोल गरेपछि खेल टाइब्रेकरमा धकेलिएको थियो । टाईब्रेकरमा समेत बराबरी भएपछि खेल सडनडेथमा पुगेको थियो । सडनडेथमा ८ नम्बर वडाका निरन्जन ढुंगानाको प्रहार बाहिरीएपछि वडा नम्बर ५ विजयी भएको हो । 
यसअघि निर्धारित समयमा वडा नम्बर ५ का तर्फबाट संजिव अर्याल र वडा नम्बर ८ का विशाल कार्कीले एक एक गोल गरेका थिए । ८ नम्बरका विजय विक खेलको म्यान अफ द म्याच भए ।