नगर कप महिला तथा पुरुष भलिवलमा वडा नम्बर १९ र १७ विजयी

२३ फागुन, हेटौंडा । शनिवार हेटौंडामा सम्पन्न भएको नगर कप महिला तथा पुरुष भलिवल प्रतियोगिताको उपाधि पुरुषतर्फ हेटौंडा उपमहानगरापालिका वडा नम्बर १७ र महिलातर्फ वडा नम्बर १९ ले जितेको छ । 
केशवलाल श्रेष्ठ स्मृति राष्ट्रिय प्रतिष्ठानको आयोजनामा भएको प्रतियोगिताको शनिवार सम्पन्न फाइनल भिडन्तमा पुरुषतर्फको खेलमा वडा नम्बर १७ ले ११ लाई २५–१५, २५–२३ र २५–१३ को सोझो सेटमा हराउँदै उपाधि जितेको हो । यसअघि वडा नम्बर १७ ले वडा नम्बर १९ लाई र वडा नम्बर ११ ले वडा नम्बर ५ लाई हराउँदै फाइनल भिडन्त पक्का गरेका थिए । 
यस्तै महिलातर्फको उपाधिका लागी वडा नम्बर १९ ले वडा नम्बर १७ लाई २५–२३, २५–८ र २५–१७ को सोझो सेटमा हराएको हो । यसअघि वडा नम्बर १९ ले वडा नम्बर १२ लाई र वडा नम्बर १७ ले वडा नम्बर ९ वडालाई सेमिफाइनलमा हराउँदै फाइनल भिडन्त पक्का गरेका थिए । 
प्रतियोगिता अन्तर्गत पुरुष तर्फको खेलमा सर्वोत्कृष्ट खेलाडी १७ नम्बर वडाका सुमन नेपाल घोषित हुँदा, उत्कृष्ट डिफेण्डर ११ नम्बर वडाका ऋतिक बर्तौला, उदयमान खेलाडी १९ नम्बरका सुवास सुवेदी, उत्कृष्ट लिफ्टर १७ का दामोदर सुवेदी, उत्कृष्ट स्पाइकर ११ का राजेश घिमिरे, ब्लकर १७ कै विवेक माझी र उत्कृष्ट प्रशिक्षक १७ नम्बर वडाकै त्रिविक्रम रुपाखेती घोषित भए ।
यसैगरी महिला तर्फको सर्वोत्कृष्ट खेलाडी १९ नम्बर वडाका सपना बस्नेत, डिफेण्डर १७ का सन्ध्या खड्का, उदयमान खेलाडी १९ का सरिता तितुङ, उत्कृष्ट लिफ्टर १९ का झरना मोक्तान, स्पाइकर १७ का सन्तोषी सुवेदी र उत्कृष्ट प्रशिक्षक १९ का राजु घले घोषित भए ।
प्रतियोगिताको महिला र पुरुषका विजेता समूहले नगद ५० हजार रुपैयाँ र उपविजेताले नगद ३० हजार रुपैयाँसहित शिल्ड, मेडल र प्रमाणपत्र प्राप्त गरेका छन् भने विधागत रुपमा उत्कृष्ठ हुने खेलाडीले जनही २ हजार ५ सय रुपैयाँ प्राप्त गरेका छन् ।