शहीद स्मृति गोल्डकपः मकवानपुरको विजयी सुरुवात

२७ फागुन, हेटौंडा । हेटौंडामा सुरु भएको स्थानीय तह शहीद स्मृति गोल्डकप अन्तराष्ट्रिय फुटबल प्रतियोगितामा आयोजक मकवानपुर ११ विजयी भएको छ ।
बिहिबार भएको उद्घाटन खेलमा अयोजक मकवानपुरले बाराको नवजनजागृति युवा क्लब सिमरालाई ४–१ गोल अन्तरले पराजित गरेको छ ।
मकवानपुरको जितका लागि विमल रानाले दुई तथा रञ्जन विष्ट र अमिर श्रेष्ठले एक/एक गोल गरे । यस्तै नवजनजागृति युवा क्लबका तर्फबाट मोहित गुरुङले सान्त्वन एक गोल फर्काए ।
खेलको म्यान अफ दी म्याच मकवानपुर ११ का विमल राना भए । उनले नगद दशहजार रुपैयाँ प्राप्त पुरस्कार गरे ।
मकवानपुरका १० वटै स्थानीय तहको सहयोगमा आयोजना भएको तेस्रो संस्करणको फुटबल प्रतियोगिताको उद्घाटन हाँस्यकलाकार सीताराम कट्टेल ‘धुर्मुस’ले गरेका थिए ।
जिल्ला फुटबल संघ मकवानपुरका अध्यक्ष टिका लामाको अध्यक्षतामा भएको उद्घाटन कार्यत्रममा जिल्ला समन्वय समिति मकवानपुरका प्रमुख रघुनाथ खुलाल, हेटौंडा उपमहनागरपालिकाका मेयर हरि बहादुर महत, बकैया गाउँपालिकाका अध्यक्ष दामोदर खनाल, भीमफेदी गाउँपालिकाका अध्यक्ष हिदम लामा, जिल्ला खेलकुद विकास समिति मकवानपुरका अध्यक्ष सानु लामा, खेलका संयोजक प्रताप विष्ट लगायतले मन्तब्य ब्यक्त गरेका थिए ।
प्रतियोगिताअन्तर्गत शुक्रबार नेपाल आर्मी क्लब र जावलाखेल युथ क्लबबीच खेल हुनेछ । चैत ७ गतेसम्म सञ्चालन हुने प्रतियोगितामा एक विदेशीसहित छ वटा ए डिभिजन, आयोजक र दुईवटा मोफासलका क्लब गरी दश टोलीको सहभागिता रहेको छ ।
प्रतियोगिताको विजेता टिमले नगद १० लाख र उपविजेता टिमले ५ लाख पुरस्कार प्राप्त गर्नेछन् ।