नेता बानियाँको पहलमा सुकौरा स्वास्थ्य चौकीलाई एम्बुलेन्स सहयोग

१० चैत, हेटौंडा । मकवानपुरगढी गाउँपालिका वडा नम्बर ७ सुकौरामा रहेको स्वास्थ्य चौकीलाई सोमबार एम्बुलेन्स हस्तान्तरण गरिएको छ । नेपाली कांग्रेस बागमती प्रदेश संसदीय दलका नेता इन्द्रबहादुर बानियाँको विशेष पहलमा स्वास्थ्य चौकीलाई एम्बुलेन्स हस्तान्तरण गरिएको हो ।
सोमबार एक कार्यक्रमको आयोजना गर्दै मकवानपुरगढी गाउँपालिका–७ का वडा अध्यक्ष एवम् स्वास्थ्यचौकी व्यवस्थापन समितिका अध्यक्ष सूर्यबहादुर रुम्बालाई एम्बुलेन्स हस्तान्तरण गरिएको हो । एम्बुलेन्स सञ्चालनपछि मकवानपुरको विकट पूर्वी क्षेत्र सुकौरा, बुढिचौर, ठिंगनलगायतका क्षेत्रका बासिन्दालाई सहज हुने नेता बानियाँले विश्वास व्यक्त गरे । 
एम्बुलेन्स हस्तान्तरण कार्यक्रममा गढी–८ का वडा अध्यक्ष कुमारसिं घिसिङ, शिवम् सिमेण्टका प्रमुख कार्यकारी निर्देशक देवेन्द्र सिन्हा, स्वास्थ्य चौकीका उपाध्यक्ष प्रतिमान रुम्बा, सुकौरा टोल विकास संस्थाका अध्यक्ष मुकुन्दप्रसाद न्यौपाने, जनता माविका प्रधानाध्यापक होमबहादुर नेपाली लगायतले मन्तव्य व्यक्त गरेका थिए । 
यस्तै कार्यक्रममा नेपाली कांग्रेस मकवानपुरको प्रतिनिधिसभा २ का संघीय सभापति यतिराज सापकोटा, नेपाली कांग्रेस हेटौंडा उपमहानगरपालिका सभापति आनन्दराम पराजुली, नेता आकाश गोले लगायतको आतिथ्यता रहेको थियो । 
नेता बानियाँको अगुवाई एवम् आर्थिक सहयोगमा एम्बुलेनस खरिद् अभियान सञ्चालन गरिएको थियो । एम्बुलेन्स खरिदका लागी शिवम् सिमेण्ट, बानियाँ निर्माण सेवा, ओम साई कन्स्ट्रक्सन, मोतिदान कन्स्ट्रक्सन र मोर्डन ईन्फ्राइस्टक्चरले पनि आर्थिक सहयोग उपलब्ध गराएका थिए ।