चुच्चेखोला वन उत्कृष्ट घोषित

२५ साउन, हेटौँडा । दोश्रो सामुदायिक वन दिवसको अवसरमा बुधवार हेटौडामा वन सँग सम्वन्धित विभिन्न संघसंस्था एवम कार्यालयहरुले कार्यक्रम गरेका छन । 
जिल्ला वन कार्यालय मकवानपुर र चुच्चेखोला सामुदायिक वन उपभोक्ता समूहले संयुक्त रुपमा वन दिवस मनाएका छन । चुच्चेखोला सामुदायिक वनले वनक्षेत्रको रामपुर डाडामा निर्माण गरिरहेको सालक पार्कमा कार्यक्रमको आयोजना गरिएको हो । कार्यक्रममा आव ०७३÷०७४ को उत्कृष्ट सामुदायिक वन तर्फ चुच्चेखोला सामुदायिक वन पहिलो सुनाचुरी सामुदायिक वन दोश्रो र मुलखोला सामुदायिक वन तेश्रो भएका छन् । 
यसैगरी, वन्यजन्तु संरक्षण तर्फ अशोक सामुदायिक वन हेटौडा–१७ पहिलो, भैरबडाँडा सामुदायिक वन हेटौडा–११ दोश्रो र कालिकाचण्डिका सामुदायिक वन भैसे तेश्रो, नदी नियन्त्रण तर्फ सिमातमाई सामुदायिक वन बकैया पहिलो, चित्रेपानी सामुदायिक वन हेटौडा दोश्रो र बेतखोल्सी सामुदायिक वन हेटौडा तेश्रो भएका थिए । कबुलियत वनतर्फ रामधुनी कबुलियती वन पहिलो, चित्रेपानी कबुलियती वन दोश्रो र क्याम्पाडाडा कबुलियती वन तेश्रो भएका थिए भने निजी वनतर्फ हेटौडा ११ का नवराज बर्तौला र जनक बहादुर रेग्मी पुरस्कृत भए ।
हेटौडा उपमहानगरपालिकाका मेयर हरिबहादुर महतको प्रमुख आतिथ्यता एवम समूहका अध्यक्ष अर्जुनप्रसाद दाहालको अध्यक्षतामा कार्यक्रम भएको थियो । कार्यक्रममा प्रमुख जिल्ला अधिकारी नारायणप्रसाद शर्मा दुवाडी, जिल्ला वन अधिकृत राजेन्द्र न्यौपाने, मकवानपुरगढी २ का वडाध्यक्ष बखानसिह पाख्रिन, ३ का वडाध्यक्ष भागवत घिमिरे, राष्टपति तराई मधेश विकास संरक्षण कार्यालय हेटौडाका प्रमुख बसन्तराज गौतम, हर्नामाडी सेक्टर कार्यालयका प्रमुख राजेन्द्रराज भण्डारी, सञ्चारकर्मी रुपेश दुलाल, समूहका कार्यालय सचिव केदार गौतम लगायतकाले मन्तव्य व्यक्त गरेका थिए ।