पत्रकार महासंघको निर्वाचनमा विपुल पोखरेलको प्यानल विजयी

२८ चैत, हेटौंडा । नेपाल पत्रकार महासंघको निर्वाचनमा विपुल पोखरेलको प्यानल नै विजयी भएको छ । शनिबार अपरान्ह सकिएको मत गणनामा पोखरेलको प्यानलले फराकिलो मतान्तरले विजयी भएको हो ।
अध्यक्षमा जित हासिल गरेका पोखरेलले ६ हजार नौ सय ४२ मत पाउँदा उनका अध्यक्षकी प्रत्यासी निर्मला शर्माले तीन हजार नौ सय १५ मत ल्याइन् । अध्यक्षका अर्का स्वतन्त्र उम्मेद्वार गजेन्द्र बुढाथोकीले ६ सय ९१ मत ल्याए । 
यस्तै वरिष्ठ उपाध्यक्षमा रमेश बिष्ट, महिला उपाध्यक्षमा बाला अधिकारी, समावेशी उपाध्यक्षमा उदय जिएम विजयी भएका हुन् । यस्तै महासचिवमा रोशन पुरी र कोषाध्यक्षमा कलेन्द्र सेजुवाल विजयी भएका छन् । 
यस्तै खुला सचिवमा गोविन्द चौलागाईँ, महिला सचिवमा सिर्जना अर्याल, आदिवासी जनजाति सचिवमा नारायणसुन्दर किलम्बू, मधेसी सचिवमा दीपेन्द्र चौहान, दलित सचिवमा हेमकर्ण विक र एशोसिएट सचिवमा पवन आचार्य विजयी भएका छन् । यस्तै लेखासमिति संयोजकमा लेखनाथ न्यौपाने निर्वाचित भएका छन् ।
पोखरेलको नेतृत्वमा प्रेस युनियन नेपाल, प्रेस संगठन नेपाल र प्रेस चौतारी (नेपाल समूह) सहित ११ संगठनले लोकतान्त्रिक प्यानल बनाएका थिए । यस्तै निर्मला शर्माको नेतृत्वमा एमालेको ओली निकट प्रेस चौतारी, जसपा, राप्रपा लगायत नौ दल निकट संगठनसँग गठबन्धन गरेको थियो । 
यो चुनावमा पहिलोपटक प्रत्यक्ष निर्वाचित प्रणाली अपनाइएको थियो । १३ हजार एक सय मतदाता रहेकोमा ९५ प्रतिशत मत खसेको निर्वाचन समितिले जनाएको छ ।