जिल्ला हुलाकले आवश्यक टिकट नदिएको गुनासो

२६ साउन, हेटौँडा । हेटौँडा विमा कम्पनीहरुले आफुहरुलाई आवश्यक हुलाक टिकट नपाएको गुनासो गरेका छन् । जिल्ला हुलाक कार्यालयले आवश्यक माग अनुसार टिक नदिंदा आफुहरुलाई समस्या परेको उनीहरुको गुनासो छ । 
हुलाकले टिकटमा कालोबजारी भएको भन्दै पर्याप्त हुलाक टिकट उपलव्ध नगराएको प्रुडेन्सियल ईन्स्योरेन्स हेटौँडाका प्रमुख अर्जुन सुवेदीले बताए । पर्याप्त टिकट नपाउँदा काममा समस्या आएको शिखर ईन्स्योरेन्स हेटौँडाका प्रमुख प्रमोद पोखरेलले बताउनुभयो । टिकट लिनैका लागि दैनिक पत्रचार गर्नुपर्ने हुलाक कार्यालयको भनाई अव्यहारिक भएको विमा कम्पनीहरुको भनाई छ । उनीहरुले व्यवसायिक संस्थालाई टिकट विक्रिमा कडाई नगर्न आग्रह गरेका छन् ।
हुलाक कार्यालयका हेम रुपाखेती भने मंहगो मूल्यमा टिकट विक्रि गर्नेहरुका कारण उपभोक्ता ठगिएको गुनासो आएकाले केही कडाई गरेको भन्दै यसले नियम संगत काम गर्नेहरुलाई पनि असुविधा पुगेको स्विकारे । उनले धेरै परिमाणमा टिकट खरिद गर्न आधिकारिक कागजात भए उपलव्ध गराउन हुलाकलाई कुनै समस्या नहुने समेत जानकारी दिए । 
मकवानपुरका प्रमुख जिल्ला अधिकारी नारायण प्रसाद शर्मा दुवाडीले प्रशासनले टिकटको कालोबजारी गर्नेलाई कारवाही गर्ने भन्दै विश्वसनीय संस्थाहरुलाई सहज टिकट उपलव्ध गराउन हुलाक कार्यालयलाई निर्देशन दिने बताए । ‘नियम कानून अनुसार हुलाक टिकट उपलव्ध गराउने दायित्व हुलाक कार्यालयको हो, हुलाक टिकट ठूलो परिमाणमा लिएर गई बढि मूल्यमा विक्रि गरेको सूचना पाए तत्काल कारवाही गछौं ।’–उनले भने । 
विमा कम्पनिहरुलाई १० र २० दरका टिकट फारम भर्ने लगायतका काममा आवश्यक पर्ने भएकाले सहज उपलव्ध गराई दिन विमा कम्पनीहरुले आग्रह गरेका छन् ।