बालकको शब भेटिएको गाडीको सवारी धनि र चालक प्रहरी नियन्त्रणमा

१९ बैशाख, हेटौंडा । दाङको तुलसीपुर उपमहानगरपालिका–६ मा तीन जना बालकको शब भेटिएको भारतीय नम्बर प्लेटको गाडीका सवारी धनि र चालकलाई प्रहरीले नियन्त्रणमा लिएको छ ।
प्रहरीले अनुसन्धानका लागि गाडी मालिक यादब प्रसाद गैरे र चालक पदम बस्नेतलाई नियन्त्रणमा लिएको जनाएको छ । उनीहरूलाई इप्रका तुलसीपुरको हिरासतमा राखेर अनुसन्धान भइरहेको तुलसीपुरका प्रमुख डीएसपी शिव सिंहले जानकारी दिएका छन् । 
उनले घटनाको अनुसन्धान चलिरहेकाले अहिले सोधपुछको लागि उनिहरुलाई नियन्त्रणमा लिएको र उनीहरु नै अभियुक्त भए नभएको बारे सत्यतथ्य सार्वजनिक नभई भन्न नसक्ने बताए ।
शनिबार साँझ नै इप्रका तुलसीपुरका प्रमुख डीएसपी शिव सिंहका अनुसार घटनाको अनुसन्धानका लागि नेपालगन्जबाट तालिमप्राप्त कुकुरसहित प्रहरीको विशेषज्ञ टोली तुलसीपुर ल्याइएको थियो ।
मृतक बालकका आफन्तहरुले भने आफ्ना सन्तानको हत्या भएको दाबी गर्दै हत्यारा पक्राउ गरी कार्वाही गर्न माग गरेका छन् ।
उक्त भारतीय गाडी २०७६ चैतमा तुलसीपुर–६ का ३३ वर्षीय यादव गैरेले ल्याएको र २०७७ माघ १ गतेदेखि सो स्थानमा पार्किङ गरी राखिएको प्रहरी अनुसन्धानका क्रममा खुलेको प्रहरीको भनाई छ ।