बाढी पहिरोका कारण ३२ जनाको मृत्यु

२८ साउन, हेटौँडा । केही दिनदेखि लगातार परेको पानीसँगै देशका विभिन्न स्थानमा आएको बाढी पहिरोमा परी ३२ जनाको ज्यान गएको गृह मन्त्रालयले जनाएको छ । गृहमन्त्री जनार्दन शर्माले शनिबार पत्रकारहरुसँग कुरा गर्दै बाढी पहिरोले र्पुयाएको क्षतिको जानकारी गराएका छन् ।
मन्त्री शर्माले दिएको जानकारी अनुसार झापामा ४, मोरङमा ३, सुनसरीमा ७, बारामा १, सर्लाहीमा १, बाँकेमा ३, पाँचथरमा ३, दाङमा १, सिन्धुलीमा ४, पाल्पामा १, र बर्दियामा १ जनाको बाढी पहिरोमा परी ज्यान गएको छ ।
यसैविच सरकारले तराईका केही जिल्ला बाढी र डुबानबाट प्रभावित भइरहेकाले अझै केही समय सतर्क रहन आग्रह गरेको छ । केन्द्रीय दैविक प्रकोप तथा उद्धार समितिको आकस्मिक बैठकपछि सरकारले मुलुकका पूर्वी तराई र पश्चिमका केही जिल्लामा आएको बाढी र पहिरोमा परेकाहरुलाई उद्धारमा सहयोग गर्न सबैलाई अपील गरेको छ ।
गृहमन्त्री जनार्दन शर्माले डुबानमा परेका क्षेत्रमा तत्काल उद्धार र राहतको काम सुरु गरिसकेको भन्दै सबै संघसंस्थालाई पनि सहयोग गर्न अपील गरेका छन् । गृहमन्त्री शर्माले बाढी पहिरोको डुबानको समस्या देखिएका जिल्लामा उद्धार टोली पठाइएपनि केही ठाउँमा भने कठिन भइरहेको बताए । उनले विभिन्न राजमार्गमा भइरहेको अवरोधसमेत हटाउने प्रयास भइरहेकाले धैर्य गर्न समेत आग्रह गरेका छन् ।
गृहमन्त्री शर्माले नेपाल प्रहरी तथा सशस्त्र प्रहरीको उद्धार टोलीलाई प्रभावित क्षेत्रमा खट्नका लागि निर्देशन दिएको जानकारी दिएका छन् ।