हेटौंडामा निषेधाज्ञा उल्लंघन गर्ने पाँच पसले प्रहरी नियन्त्रणमा

२३ बैशाख, हेटौंडा । मकवानपुरको ४ स्थानिय तहमा आइतबार राति १२ बजेबाट निषेधाज्ञा जारी गरिएको छ। मकवानपुर प्रशासनले कोरोना संक्रमितको संख्या बढ्दै गएकोले हेटौंडा उपमहानगर सहित थाहानगर,भिमफेदी र मनहरी गाउँपालिकामा निषेधाज्ञा लगाएको छ ।  

निषेधाज्ञामा अनुमतिप्राप्त सवारी र व्यवसाय सञ्चालनलाई निश्चित समय सम्म अनुमति दिइएको छ  भने लकडाउन उल्लंघन नहोस भन्दै प्रहरी प्रशासनले कडिकडाउ गर्दै आएको छ ।

यसै क्रममा आज निषेधाज्ञाको चौथो दिन हेटौंडामा निषेधाज्ञा उल्लंघन गरी व्यवसाय संचालन गर्ने र पसल खोल्ने ५ जनालाई प्रहरीले नियन्त्रणमा लिएको छ । हेटौंडा बजारमा जबर्जस्ती पसल खोल्ने ५ जनालाई नियन्त्रणमा लिएको मकवानपुर प्रहरी प्रमुख प्रहरी उपरीक्षक सोमेन्द्र सिंह राठौरले प्रष्ट खबरलाई बताएका छन।

"हामीले पसल नखोल्नुस भनेर धेरै पटक सम्झाई बुझाई गर्दा पनि मान्नु भएन,बाध्य भएर नियन्त्रणमा लिएका हौं,अब कार्वाही प्रकृया सुरु गर्छौ"-एसपी राठौरले भने । 

नियन्त्रणमा लिइएकोमा हार्डवेयर पसलले,कपडा व्यवसायी र टेलर्स पसले रहेको एसपी राठौरले बताएका छन । उनले बिहान १० बजेसम्म बिना पासका,अनुमति भन्दा बाहेक चलाइएका २ दर्जन भन्दा बढी सवारी नियन्त्रणमा लिएर राखिएको बताए ।

प्रहरीले हेटौंडा बजार प्रवेश गर्ने नाका हेटौंडा-५ क्याम्पाडाँडा, हेटौंडा-१ चौकीटोल, हेटौंडा-१० राप्तिपुल र हेटौंडा-४ कर्राका साथै बुद्धचोक, सिमाचोकमा चेकजाँचलाई कडाई गरेको छ ।