मकवानपुरका एक परिवारका ७ वेपत्ता (कहाँ के भयो ?)

मन्थलीमा बाढि पहिरोले निम्त्याको भयावह अवस्था । तस्विरहरु सोम तमल्सिना

रुपेश दुलाल
२९ साउन, हेटौँडा । पूर्वी मकवानपुरको बकैया गाउँपालिका अम्बासबेसीमा पहिरोले घरसंगै एकै परिवारका ७ जनालाई बगाएको छ । पहिरोले घरसहित परिवारर्लाइ बगाएरर तलको सेरु खेलामा पु¥याएको हो ।

बगाएर बेपत्ता हुनेमा ५० बर्षिय मंगलसिं न्यासुर, उनकी ४८ बर्षिया श्रीमति सुनमाया, छोरीहरु २४ बर्षिया माया, १२ बर्षिया हिरा, १० बर्षिया सानुमाया, ८ बर्षिया पाल्मो र २ बर्षिय छोरा विकास रहेका छन् । उनीहरुको स्थानीयले खोजी जारी राखेको स्थानीय बुद्ध लामाले बताए । पहिरोले गोठसंगै  ४ वटा भैसी, १ हल गोरुसहित कुखुरा, बाख्रा पनि बगाएको छ । अम्बासमा अन्य घरहरु पनि जोखिममा रहेको स्थानीय सन्तबहादुर भोलनले जानकारी दिनुभयो ।

बकैया–३ जलजलेमा एक महिला र एक पुरुषलाई खोलाले बगाएको मकवानपुरका प्रहरी उपरीक्षक विकासराज खनालले बताउनुभयो । उहाँका अनुसार बकैंया–६ मा ४२ बर्षिय विरबहादुर घलानलाई पनि खोलाले बगाएको छ । प्राकृतिक प्रकोपले असर गरेका क्षेत्रमा जिल्ला र नजिकका क्षेत्रका प्रहरी युनिटको टोली परिचालन गरिएको एसपी खनालले बताउनुभयो ।

उता, पश्चिमी मकवानपुरको राक्सिराङान पनि खोला र पहिरोले धेरै घरमा क्षति पु¥याएको राक्सिराङ वडा नम्बर १ का अध्यक्ष कान्छाराम रुम्बाले बताउनुभयो । उहाँका अनुसार मछेडीमा रहेका १८ वटा पसलमध्ये ६ वटालाई खोलाले बगाएको छ । भने बाँकीलाई पुरेको छ । ज्यामिरेमा नवराज रुम्बाको घर पुरिएको छ । सानोभावरमा जोगमान थिङको घर बगाएको, विजय मोक्तान र प्रदीप मोक्तानको घर पुरिएको रुम्बाको भनाई छ ।

मकवानपुरका सदरमुकाम हेटौँडाबाट ग्रामिण भेगमा जाने सडक अवरुद्ध भएका छन् । चुरे र महाभारत पहाडबाट बग्ने खोला र खहरेका कारण सडक अवरुद्ध भएको हो । विद्युत सुविधा पनि सदरमुकाम हेटौँडामा मात्रै रहेको छ । सूचना लिन समस्या हुँदा उद्धारका लागि प्रशासनलाई असहज भएको छ ।