सत्तापक्ष राप्रपा फुटाउने षड्यन्त्र गर्दैछ : थापा

२९ साउन, हेटौँडा । राष्ट्रिय राजातन्त्र पार्टीका अध्यक्ष कमल थापाले सत्ता पक्ष राप्रपालाई फुटाउने षड्यन्त्रमा लागेको आरोप लगाएका छन् । हेटौँडामा आइतबार पत्रकार सम्मेलन गर्दै थापाले आयोगसंग यसबारेमा पटक पटक छलफल भएको प्रमाण आफुसंग रहेको दावि गरे ।

उनले प्रदेश नम्बर २ मा तेस्रो चरणको चुनाव गर्नुपर्ने जिम्मेवारी रहेको आयोग यस्तो विवादमा फस्न नुहने बताए । यसले राजनैतिक दललाई समेत मानसिक तनाव नदिन आयोगलाई थापाले ध्यानकर्षण गराए । पशुपति सम्शेर राणा पक्षले दर्ता गरेको निवेदन खारेज गर्न निर्वाचन आयोगलाई आग्रह गरेका छन् । थापाले राणासंग नयाँ पार्टी दर्ताका लागि प्रयाप्त सदस्य नरहेकाले रित नपुगेको भन्दै यसलाई तत्काल खारेज गर्न आग्रह गरे ।

हस्ताक्षर सनाखतका लागि म्याद थप्ने कुनै कानूनी प्रावधान नरहेको भन्दै उहाँले राजनैतिक प्रभावमा नपर्न पनि निर्वाचन आयोगलाई अनुरोध गरे । दर्ताका लागि आवश्यक संख्या नपुगेपछि राणाले म्याद थप्न आयोगलाई आग्रह गरेको भन्दै अझै पनि आवश्यक संख्या पु¥याउन नसक्ने दावि थापाको छ । आयोगको गलत निर्णयले दलिय व्यवस्थामा नकारात्मक असर पर्ने भएकाले यसतर्फ नलाग्न आयोगलाई उनको सुझाव थियो । पत्रकार सम्मेलनमा सहमहामन्त्री राजाराम थापा, हेटौंडा नगर अध्यक्ष गुरुप्रसाद सापकोटा लगायतको सहभागिता रहेको थियो ।