क्षतिप्रति कांग्रेस र एमालेद्वारा दुःख व्यक्त

२९ साउन, हेटौँडा । मकवानपुर लगायत देशका विभिन्न भागमा बाढि पहिरोका कारण भएको जनधनको क्षतिप्रति नेपाली कांग्रेस मकवानपुर र नेकपा एमाले मकवानपुरले दुःख व्यक्त गरेको छ । बाढी र पहिरोको कारणले धनजनको क्षति हुनुका साथै जनजीवन कष्टकर भएकोमा नेपाली काँग्रेस मकवानपुरले दुःख व्यक्त गरेको हो ।

जिल्ला सभापति एवं पूर्व गृहराज्यमन्त्री इन्द्रबहादुर बानियाँद्वारा जारी विज्ञप्तिमा राहत तथा उद्धार कार्यमा लाग्न र यथासक्य सहयोगका लागि परिचालित हुन पार्टीका जिल्ला कार्यसमिति, क्षेत्र, नगर वडा कार्यसमिति, गाउँ वडा सभापतिसहित भातृ एवं शुभेच्छुक संगठनलाई निर्देशन दिईएको छ । कांग्रेसले क्षतिको जिल्ला पार्टी कार्यालयमा क्षतिको विवरण संकलन गरी बुझाउन समेत भनेको छ ।

यस्तै, नेकपा एमाले मकवानपुरले पनि  बर्षाका कारण जिल्लाका बिभिन्न स्थानमा मानबिय तथा भौतिक क्षति भएकोमा दुःख व्यक्त गरेको छ । अध्यक्ष मुनु सिग्देलले विज्ञप्ति जारी गर्दै बकैयाँ गाउँपालिका, भिमफेदी गाउँपालिका र बागमति गाउँपालिकामा बाढी तथा पहिरोले बगाएर जनधनको क्षति भएको खबरले दुखित बनाएको बताईन् । राहत र उद्धारमा जुट्न समेत एमालेले सबैलाई आग्रह गरेको छ ।