राक्सिराङमा अक्सिजनसहितको कोभिड अस्पताल तयार

२८ बैशाख, हेटौंडा । मकवानपुरको विकट राक्सिराङ गाउँपालिकाले कोरोना भाइरस संक्रमितको उपचारको लागि सुविधा सम्पन्न कोभिड अस्पताल निर्माण गरेको छ । 
राक्सिराङ–५ स्थित ठाडेचुरेमा निर्माण भएको २६ बेडको कोभिड अस्पतालको लागि आवश्यक अक्सिजनसहितको सामाग्रीसमेत खरिद गरिसकिएको राक्सिराङ गाउँपालिकाका अध्यक्ष राजकुमार मल्लले जानकारी दिए । 
विपद व्यवस्थापन कोषबाट ५० लाख रुपैयाँ विनियोजन गरी ३५ सिलिन्डर अक्सिजन, हजार पिस एन्टिजेन किट, पिपिई, मास्क, सेनिटाइजर, औषधिलगायतका सामाग्री खरिद गरिएको अध्यक्ष मल्लले बताए ।
अक्सिजनसहितको कोभिड अस्पतालमा डाक्टरसहितको स्वास्थ्यकर्मी र स्वास्थ्य सामाग्री उपलब्ध गराउन सक्षम भएका बताउँदै अध्यक्ष मल्लले गाउँपालिकामा रहेका कुुल ४१ जना स्वास्थ्यकर्मी मध्ये कोभिड अस्पतालमा १० जना स्वास्थ्यकर्मी खटाइने जानकारी दिए ।
गाउँपालिकाका स्वास्थ्य शाखा प्रमुख विजय कापरीले कोभिड अस्पतालमा एक जना डाक्टर, एकजना स्टाफ नर्स, एक जना हेल्थ असिस्टेन्ट, २ जना अनमी, २ जना अहेब र ३ जना कार्यालय सहयोगी खटिने बताए ।
उनका अनुसार हाल गाउँपालिकामा ४ जना सक्रिय संक्रमित रहेको र सबैजना होम आइसोलेशनमा रहेका छन् ।