मकवानपुरमा स्वास्थ्य पूर्वाधारको व्यवस्थापनका लागी निजि क्षेत्रसँग अपिल

३० बैशाख, हेटौंडा । जिल्लामा कोरोना संक्रमितहरुको उपचारका लागि स्वास्थ्य पूर्वाधारको अभाव हुन थालेपछि जिल्ला कोभिड–१९ संकट व्यवस्थापन केन्द्र (डिसिसिएमसी)ले निजि क्षेत्रसँग सहयोगको लागि अपिल गरेको छ । 
बुधबारको बैठकले निजी क्षेत्रलाई स्वास्थ्य पूर्वाधारको लागि समन्वय गर्न आग्रह गर्ने निर्णय गरेको हो । अहिलेको स्वास्थ्यकर्मी र स्वास्थ्य पूर्वाधारले बढ्दो संकटलाई सम्बोधन गर्न नसक्ने भन्दै मकवानपुरका प्रमुख जिल्ला अधिकारी भरतमणि पाण्डेले जिल्ला भित्र सञ्चालनमा रहेका औद्योगिक प्रतिष्ठानहरुले उद्योग संघसँगको समन्वयमा स्वास्थ्य पूर्वाधारहरु व्यवस्थापन गर्ने र थप स्वास्थ्यकर्मी खटाउन आवश्यक सहयोग गर्ने योजना बनाइने निर्णय भएको छ । 
स्वाथ्यकर्मीको व्ययवस्थापनका लागि यस अघि नै स्थानीय सरकारसँग केन्द्रले आग्रह गरिसकेको छ । यस्तै, हेटौंडा अस्पतालमा अक्सिजन अभाव हुन नदिन अक्सिजन व्यवस्थापन समिति गठन भएको छ । 
हेटौंडा अस्पताल सञ्चालन तथा व्यवस्थापन समितिका सदस्य सुपेन्द्र कार्कीको संयोजकत्वमा जिल्ला प्रशासन कार्यालयका प्रशासकीय अधिकृत दिलिप श्रेष्ठ र हेटौंडास्थित तीन वटै अक्सिजन सप्लायर्सका प्रमुखहरु सदस्य रहने समिति गठन भएको छ । समितिले जिल्लामा आवश्यक पर्ने अक्सिजनको आंकलन र नियमित आपुर्तिको व्यवस्था मिलाउने प्रजिअ पाण्डेले जानकारी दिए ।