प्रधानमन्त्रीको शपथ विरुद्ध रिट निवेदन दर्ता, मंगलबारलाई पेशि तोकियो

३ जेष्ठ हेटौंडा । प्रधानमन्त्री केपी शर्मा ओलीले गैरसंवैधानिक रुपमा सपथ लिएको भन्दै पुनः सपथ ग्रहणको माग गर्दै सर्वोच्च अदालतमा रिट निवेदन दर्ता भएको छ । 
संविधानको धारा ८० अनुसार प्रधानमन्त्री, उपप्रधानमन्त्री, मन्त्री र राज्यमन्त्रीले संघीय कानुन बमोजिम पद तथा गोपनियताको सपथ लिनुपर्ने भएपनि हालसम्म संघीय कानुन नबनेकोले प्रधानमन्त्री लगायत मन्त्रीहरुको सपथ गैरसंवैधानिक भएको भन्दै तत्काल प्रधानमन्त्री ओलीलाई काम कारबाही गर्न नदिन र पुनः सपथ ग्रहण गराउन रिट निवेदन दर्ता गरिएको हो ।
प्रधानमन्त्री केपी शर्मा ओलीले बैशाख ३१ गते प्रधानमन्त्रीको रुपमा राष्ट्रपति बिद्यादेवी भण्डारीबाट सपथ लिएका थिए । 
प्रधानमन्त्री ओलीले शपथ लिँदा ‘प्रतिज्ञा गर्छु’ भन्ने शब्द उच्चारण नगरेपछि राष्ट्रपति भण्डारीले दाहो¥याउँदा उनले ‘त्यो पर्दैन’ भनेका थिए । यही कारण प्रधानमन्त्रीको सपथ ग्रहण विवादमा तानिएको थियो । 
रिट निवेदनमा संघीय संसदको सदस्य नरहेका ७ जना मन्त्रीहरुलाई पनि संविधान विपरित नियुक्त गरिएकोले उहाँहरुलाई पदमुक्त गर्नपनि माग गरिएको छ । 
सांसद नभएको भएपनि प्रधानमन्त्री ओलीले दुई÷दुई पटक मन्त्री नियुक्त गर्नुभएको र यस्तो व्यवस्था संविधानमा नभएको भन्दै वरिष्ठ अधिवक्ता चन्द्रकान्त ज्ञवाली, अधिवक्ताहरु लोकेन्द्र ओली र सन्तोष भण्डारीले सोमबार रिट दर्ता गराएका हुन् । सो रिट निवेदन माथिको पेशी मंगलबारलाई तोकिएको  छ ।