सामुदायिक कोभिड रेस्पोन्स कार्यदललाई सहयोग जुट्ने क्रम जारी

८ जेठ, हेटौंडा । हेटौंडा-६ का  रुपक ढकालले हेटौंडा ६ नम्बर वडाको संयोजनमा कोरोना भाईरस रोकथाम तथा नियन्त्रणका लागि बनेको कोभिड १९ सामुदायिक रेस्पोन्स कार्यदल हेटौंडा ६ र १७ लाई ५ हजार ५ रुपैयाँ सहयोग गरे । 
समुदायमा कोरोना फैलन नदिन सचेतना फैलाउने उद्देश्यका साथ निर्माण भएको कार्यदलमा सहयोगी हातहरु दिनप्रतिदिन थपिँदै गएका छन् । व्यवसायको हिसाबले दैनिक ज्याला मजदुरी गर्दै प्लम्बिङको काम गर्दै आएका ढकाल सहित उद्योगी व्यवसायी एवम् सामाजिक व्यक्तित्वहरुको सहयोग गर्ने क्रम जारी रहेको छ । 
मैले दैनिक ज्यालादारी गरेर आफ्नो परिवार धानिरहेको छु, ढकालले भने,‘कोरोना भाईरस जो कोहीलाई पनि लाग्न सक्छ । मेरो परिवारलाई कोरोनाको संक्रमण भएको खण्डमा मेरो आम्दानीले उपचार गर्न समेत पुग्दैन । त्यसैले कार्यदललाई सहयोग गरेको  हुँ ।’ आफ्नो आम्दानीले परिवारलाई संक्रमणबाट जोगाउन नसक्दा वडामा बनेको कार्यदलबाट सहयोग पाउने आशामा आफूले सहयोग गरेको उनले बताए ।
कार्यदलले हेटौंडा ६ र १७ मा कोरोना संक्रमित हरुलाई दैनिक रुपमा भेटघाट गर्नुका साथै परामर्शको काम समेत गर्दै आएको छ । हेटौंडा ६ र १७ लाई मुख्य कार्यक्षेत्र बनाएको कार्यदलले आवश्यकताको आधारमा छिमेकी वडाहरुका साथै मकवानपुर गढी गाउँपालिकाका विभिन्न वडाहरुमा पनि सहयोग गरिरहेको कार्यदलका सहसंयोजक भरत सापकोटाले जानकारी दिए । कार्यदलले मकवानपुर गढी गाउँपालिका वडा नम्बर २ मा रहेको स्वास्थ्य चौकीलाई ३ थान अक्सिजन समेत सहयोग गरेको छ । 
कार्यदलले हेटौंडा ६ र १७ का विभिन्न स्थानमा हात धुने पानी टंकी राख्ने समेत निर्णय गरेको छ । हेटौंडा ६ को जनकल्याण बचत तथा ऋण सहकारी संस्थाको भवन अगाडी, ६ नम्बर वडा कार्यालयमा, रानी सामुदायिक वन उपभोक्ता समूहको भवन अगाडी, चुच्चेखोला चोक, हात्तिलेटमा रहेको नारायणी दुग्ध उत्पादक सहकारी संस्था अगाडी र हेटौंडा १७ गैरीगाउँमा लक्ष्मीनारायण मन्दिरको अगाडी हात धुनका लागि पानी ट्यांकी राख्ने निर्णय भएको सहसंयोजक सापकोटाले जानकारी दिए।
कार्यदलले आर्थिक पारदर्शिताका लागि दैनिक रुपमा सामाजिक सञ्जालमा आयव्ययको विवरण राख्ने गरेको र साप्ताहिक रुपमा बैठकमा आयव्ययको पारदर्शिताको काम गरिरहेको आर्थिक समितिका सहसंयोजक देवराज गौतमले जानकारी दिए । सहयोगी दाताहरुकै कारण कार्यदलले यो काम गर्न सम्भव भएको र आगामी दिनमा पनि अझै प्रभावकारी रुपमा कार्यदलले काम गर्दै जाने संयोजक एवं ६ नम्बर वडा अध्यक्ष अर्जुनप्रसाद चौलागाईले जानकारी दिए ।