राप्रपाको केन्द्रीय बैठक हेटौँडामा शुरु

१ भदौं, हेटौँडा । राष्ट्रिय प्रजातन्त्र पार्टीको केन्द्रीय कार्यसमिति बैठक विहिबारदेखि हेटौडामा शुरु भएको छ ।  पार्टी विभाजनपछि पहिलो पटक बैठक बस्न लागेकाले यसलाई विशेष बैठकको रुपमा हेरिएको छ ।

संसद र प्रदेशको निर्वाचनको समय नजिकिंदै भएको पार्टी विभाजन र संसदमा अघि बढेको संविधान संशोधनमा पार्टी धारणा नै बैठकको मूख्य एजेण्डा छ । बैठकका लागि ८ वटा एजेण्डा तय भएको प्रवक्ता भुवन पाठकले संचारकर्मीहरुलाई जानकारी दिए । बैठकमा बाढी पहिरो र डुवानका बारेमा, वर्तमान राजनीतिक परिस्थितिबारे समिक्षा, पार्टी विभाजनको प्रयास र क्षति न्यूनिकरण, संविधान संशोधनबारे पार्टीको धारणा, २ नम्बर प्रदेशको निर्वाचन, संसद र प्रादेशिक निर्वाचन, पार्टीको भावी कार्यक्रम र समसामयीक विषयबस्तुमाथि छलफल हुने जनाईएको छ ।

बैठकमा १ सय ५६ सदस्यीय कार्यसमितिका एक सय १० जना केन्द्रीय सदस्यहरुको उपस्थिति रहेको बताउँदै प्रवक्ता पाठकले भदौ ४ गते अघि नै आफुहरुसँग एक सय १५ जना केन्द्रीय सदस्य रहने दावि गरे । बैठक शुभारम्भ गर्दै राप्रपा अध्यक्ष कमल थापाले पार्टी विभाजनका लागि आवश्यक पर्ने ४० प्रतिशत आवश्यक पर्ने प्रावधान अनुसार रित नपुगेको निवदेन दर्ता गरेको बताउनुभयो । उहाँले रित नपुगको निवदेन दर्ता गर्ने आयोगले सनाखतका लागि पटक पटक समय दिएर कानून विपरितको काम गरिरहेको बताए । केन्द्रीय कार्यसमिति बैठक भदौं ३ गतेसम्म चल्ने जनाईएको छ ।