निषेधाज्ञा उल्लङ्घन गर्ने हेटौंडाका व्यवसायी हिरालाललाई १० हजार जरिवाना

२१ जेठ,हेटौंडा। हेटौंडाको  मुख्य बजार स्कुल रोडमा निषेधाज्ञा उल्लङ्घन गरी प्रहरी र प्रशासनका अनुगमनको  वेवास्ता गरी मिनि मार्केट संचालन गरेको अवस्थामा पक्राउ परेका  हेटौंडा-४ स्कुल रोडमा रहेको घर संसार मिनि मार्केट संचालक हिरालाल केशरीलाई जिल्ला प्रशासन कार्यालय मकवानपुरले जरिवाना तिराएको छ।उनलाई कोभिड-१९ संकट व्यवस्थापन अध्यादेश-२०७८ को दफा २१ को उपदफा १(क) बमोजिम कारवाही १० हजार जरिवाना गरिएको मकवानपुरका प्रजिअ भरतमणि पाण्डेले बताएका छन्।

जिल्ला प्रशासन कार्यालय नेतृत्वको बजार अनुगमन टोलीलाई अटेर गरेपछि उनलाई शुक्रबार बिहान प्रहरीले नियन्त्रणमा लिएको हो।जिल्ला प्रशासन कार्यालय मकवानपुरका प्रशासकीय अधिकृत गुणराज न्यौपानेको टोलीले मिनि मार्केट नखोल्नु र किराना पसलमा भिडभाड नगरी व्यवसाय गर्न दिएको निर्देशनलाई वेवास्ता गरेपछि प्रहरीले उनलाई नियन्त्रणमा लिएको थियो। 

त्यसैगरी निषेधाज्ञा उल्लङ्घन गरी तोकिएको भन्दा बाहेकको पसल खुल्ने हेटौडा-२ कान्तिराजपथबाट एक हाडवेयर  पसले र हेटौडा-१ का कपडा पसलेलाई जिल्ला प्रशासन कार्यालयले २ हजार र ५ हजार जरिवाना गरेको छ।उनीहरूलाई पसल खोलेर सामान बेचेको अवस्थामा वडा प्रहरी कार्यालय हेटौडाको प्रहरी टोलीले पक्राउ गरेको थियो।