केन्द्रीय सदस्य अपहरण गरेको भन्नु हास्यास्पद : कमल थापा

२ भदौं, हेटौँडा । राष्ट्रिय प्रजातन्त्र पार्टीका अध्यक्ष कमल थापाले आफुले केन्द्रीय सदस्यहरुलाई अपहरण गरेको भन्नु हास्यास्पद भएको बताएका छन् । आफ्ना पक्षका केन्द्रीय सदस्यहरुलाई अपहरण शैलीमा लुकाएको पशुपति शम्शेर राणाद्वारा शुक्रबार सर्वोच्च अदालतमा दायर रिटमा उल्लेख भएको भन्दै थापाले यो कुरा हास्यास्पद भएको बताएका हुन् ।
हेटौँडामा दुई दिनदेखि जारी केन्द्रीय कार्यसमिति बैठकका क्रममा संचारकर्मीहरुसँग कुरा गर्दै यस्तो कुरा गर्न राणालाई नसुहाउने बताए । उनले पार्टीको केन्द्रीय कार्यसमितिको बैठकमा कारवाही गरेपछि रहेका १ सय ४० मध्ये १ सय ४ जना सदस्यहरु उपस्थिति रहेको भन्दै सत्ता लोभी र अवसरवादीहरुले राणालाई दुरुपयोग गरेको बताए । उनले राणामा पार्टी दर्ताका लागि आवश्यक ४० प्रतिशत नपुग्ने भएपछि विक्षिप्तता  आएको समेत थापाको दावि छ । उनले भदौं ४ गते पार्टी दर्ताबारे निर्वाचन आयोगले गर्ने निर्णय पछि मात्रै संविधान संशोधनबारे पार्टी धारणा अघि सार्ने समेत बताए ।
बैठकमा सहभागी केन्द्रीय सदस्यहरुले जनताले मत दिएर संविधान लेखनका लागि पठाएका सांसद पार्टी फुटाउने खेलमा लागेको भन्दै कारवाही माग गरेका थिए । बैठकमा पार्टीको संगठन परिचालन, अन्तराष्ट्रिय सम्बन्ध, सामाजिक अभियानमा पार्टीलाई परिचालन लगायतका विषयमा नेतृत्वलाई सदस्यहरुले सुझाव दिएका थिए । बैठक शनिबारसम्म चल्ने छ ।