पीडितलाई विदेशमा सहयोग जुटाउँदै मकवानपुरे

४ भदौं, हेटौँडा । एक साताअघि भिषण वर्षासँगै आएको बाढीपहिरोबाट पीडित स्थानीयलाई सहयोग गर्न प्रवासमा रहेका मकवानपुरे युवाहरु सक्रिय भएका छन् । मकवानपुरको हाँडीखोला र मनहरीका बाढीपहिरो पीडितलाई सहयोग गर्नको लागि जापान र कोरियामा रहेका युवाहरुले आर्थिक संकलन गरिरहेका हुन् ।
हाँडीखोला घर भई जापान र कोरियामा रहेका युवाको विशेष पहलमा आर्थिक संकलन अभियान सुरु गरिएको छ । हालसम्म जापान र कोरियामा गरी करिब एक लाख रुपियाँ संकलन भइसकेको जापानबाट श्रीराम रिजालले जानकारी दिए । आर्थिक सहयोग संकलनको क्रम जारी रहेको बताउँदै रिजालले अर्को सातासम्ममा पीडितसमक्ष आएर आर्थिक सहयोग रकम दिने जानकारी दिए । आगामी सातासम्ममा मकवानपुर जापान समाजका अध्यक्ष बच्चुराम अर्याल आफैं नेपाल आई पीडितलाई सहयोग दिने बताइएको छ । 
मकवानपुर जापान समाजका पदाधिकारी र हाँडीखोला प्रवासी समूहका अभियन्ता सञ्जीव पाठकसहितले पीडितलाई आर्थिक सहायता उपलब्ध गराउनेछन् । आर्थिक सहयोग संकलनको लागि जापानबाट श्रीराम रिजाल, बच्चुराम अर्याल र अजय वर्तौला, राजु थोकर, सुरेश लामा, धिरज पौडेल लागिपरेका छन् भने कोरियामा उमेश गौतम, समिरराज घिमिरेलगायत सक्रिय रहेका छन् ।
जापानमा रहेका हाँडीखोलाका स्थानीय श्रीराम रिजालले आफ्नो गाउँमा भएको विपत्तिप्रति निकै दुःख लागेको भन्दै थोरै भए पनि राहतको लागि आफूहरुले आर्थिक संकलन गरेको बताए ।